Shymkent pen Pavlodar qalalaryndaǵy temirjol vokzaldarynda qaıta jańartý jumystary aıaqtaldy, dep habarlaıdy Almaty-akshamy.kz Kólik mınıstrligine silteme jasap.
Máselen, Shymkent temirjol vokzalynda aýqymdy rekonstrýksıa jumystary júrgizildi. Vokzal ótken ǵasyrdyń 60-jyldarynda boı kótergen. Strategıalyq nysanda 20 jyldan astam ýaqyt boıy kúrdeli jóndeý júrgizilmegen. Vokzal táýlik saıyn birneshe myń jolaýshyny qabyldaýǵa qaýqarly. Qaıta qurý jumystarynan keıin ǵımarat syrty tartymdy kelbetke ıe boldy. Endigi kezekte vokzaldyń jalpy aýdany 2 249,33 sharshy metrge deıin ulǵaıdy jáne vokzal táýligine 6 myń adamǵa deıin qabyldaı alady. Kútý zaldarynyń da aýdany 1982,3 sharshy metrge deıin ulǵaıdy. Bılet kasalarynyń sany altydan segizge deıin ósti. Namazhana jáne ana men bala bólmesi tıisti jıhazben jabdyqtalǵan.
Pavlodar temirjol vokzaly da bıyl tolyǵymen jóndelgenin atap ótken oryndy. Vokzal ǵımaraty 40 jyldan astam ýaqyt buryn salynǵan. Nysanda buǵan deıin kúrdeli jóndeý jumystary 2004-2005 jyldary júrgizilgen. Jóndeý jumystarynyń nátıjesinde jaryqtandyrý, jeldetý, sý jáne jylytý júıeleri aýystyrylǵan. Vokzal biryńǵaı kútý aımaǵymen jabdyqtaldy. Saqtaý kamerasy men dárihana da halyqqa qyzmet kórsetedi. Ana men balaǵa arnalǵan jeke bólme, oıyn alańy ashylǵan. Múmkindigi shekteýli jandar úshin lıftiler men arnaıy kótergishter ornatylǵan. Jalpy kúrdeli jóndeý jáne qaıta jańartý jumystary zamanaýı talaptardy eskere otyryp júrgizilgen.