Aı-92 jáne Aı-93 markaly benzınge shekti baǵa belgileý josparlanýda.
Energetıka mınıstrligi baǵany memlekettik retteý belgilengen munaı ónimderin bólshek saýdada ótkizýdiń shekti baǵalaryna ózgerister engiziletin buıryq jobasyn daıyndady, dep habarlaıdy Almaty-akshamy.kz Egemen.kz silteme jasap.
Máselen, Aı-92 jáne Aı-93 markaly benzınge shekti baǵa belgileý josparlanýda:
- Qostanaı, Soltústik Qazaqstan oblystarynda - lıtrine 187 teńge;
- Nur-Sultan, Almaty, Shymkent qalalarynda, Aqmola, Aqtóbe, Shyǵys Qazaqstan, Batys Qazaqstan, Almaty, Atyraý, Jambyl, Qaraǵandy, Qyzylorda, Pavlodar, Túrkistan, Mańǵystaý oblystarynda, sondaı-aq Abaı, Jetisý, Ulytaý oblystarynda - lıtrine 182 teńge.
Qazir atalǵan markaly benzınniń shekti baǵasy elimizdiń barlyq óńirlerinde 182 teńgege belgilengen.
Energetıka mınıstrligi túsindirgendeı, Qostanaı jáne Soltústik Qazaqstan oblystary úshin Aı-92 jáne Aı-93 markaly benzınge 5 teńge/lıtrge baǵanyń ósýi usynylady, sebebi operasıalyq (logıstıkalyq) shyǵyndardyń deńgeıi bólshek satýshylardyń munaı ónimderin óndirýshi zaýyttardan qashyqtyǵyna baılanysty Qazaqstannyń basqa oblystaryna qaraǵanda joǵary.
Mundaı baǵalardy 180 kúntizbelik kúnge belgileý josparlanýda.
Dızel otynynyń baǵasy (jazǵy, maýsymaralyq) ózgerissiz qalady:
- Aqmola, Aqtóbe, Shyǵys Qazaqstan, Batys Qazaqstan, Qostanaı, Soltústik Qazaqstan oblystarynda, sondaı-aq Abaı oblysynda - lıtrine 260 teńge;
- Nur-Sultan, Almaty, Shymkent qalalarynda, Almaty, Atyraý, Jambyl, Qaraǵandy, Qyzylorda, Pavlodar, Túrkistan, Mańǵystaý oblystarynda, sondaı – aq Jetisý, Ulytaý oblystarynda-lıtrine 230 teńge.
Qujat 8 shildege deıin Ashyq NQA saıtynda ornalastyrylǵan.