Kólik mınıstrligi bul baǵytta kelissóz júrgizip jatyr.
Aqtóbe, Túrkistan, Qyzylorda áýejaıy sheteldik ınvestorlardyń basqarýyna berilýi múmkin, dep habarlaıdy Almaty-akshamy.kz
Bul týraly vedomstvo basshysy Marat Qarabaev Úkimet otyrysynda aıtty.
"Elimizdiń áýejaılarynda mýltımodaldy ortalyqtar qurý maqsatynda qajetti quzyreti men kapıtaly bar jeke ınvestorlardy tartý boıynsha keshendi jumystar júrgizilip jatyr. Onyń aıasynda Astana, Almaty jáne Shymkent áýejaılaryna ınvestorlar tartylyp, ushý-qoný jolaqtaryn, janarmaı quıý keshenderin rekonstrýksıalaý, jolaýshylar jáne júk termınaldaryn keńeıtý jumystary kezeń kezeńimen iske asyrylyp jatyr", - dedi mınıstr.
Onyń málimetinshe, Qaraǵandy áýejaıynda ınvestor ushý-qoný jolaǵyn jáne qajetti arnaıy tehnıkany jańǵyrtýdy josparlap otyr.
"Aqtóbe, Túrkistan jáne Qyzylorda áýejaılaryn osy salada tájirıbesi bar jahandyq iri ınvestorlarǵa senimgerlik basqarýǵa berý boıynsha kelissózder júrgizilip jatyr", - dep atap ótti Kólik mınıstri Marat Qarabaev..