Batys Qazaqstan oblysy polısıa departamentiniń esirtki qylmysyna qarsy is-qımyl basqarmasynyń qyzmetkerleri Batys Qazaqstan jáne Atyraý oblystarynyń aýmaǵynda baılanyssyz jasyrý ádisimen marıhýana jáne gashısh esirtki quraldaryn satýmen aınalysqan ınternet-dúkenge tosqaýyl qoıdy.
Jedel-tergeý is-sharalaryn júrgizý barysynda joǵaryda atalǵan ınternet-dúkenniń operatory jáne kýreri bolǵan Oral qalasynyń eki turǵyny ustaldy, dep habarlaıdy Almaty-akshamy.kz
Atyraý, Oral jáne Aqsaı qalalarynda olar buryn jasyryp ketken 500-den astam esirtki oramy tárkilendi. Aıta ketý kerek, olardyń 300-den astamy Atyraýda Jaıyq ózeniniń jaǵasyndaǵy qoǵamdyq oryndardan tabyldy.
Qazirgi tańda esirtki dúkenin uıymdastyrýshyny anyqtaý jáne ony buǵattaý boıynsha jumys júrgizilip jatyr.
«Jyl basynan beri İshki ister mınıstrligi ınternet-dúkenderdiń 19 uıymdastyrýshysyn, 105 operator men 297 esirtki jasyrýshyny ustady. Esirtki quraldarynyń taralýy týraly aqparatty qamtıtyn 3500 ınternet-resýrs anyqtalyp, buǵattaldy», – dedi QR İİM esirtki qylmysyna qarsy is-qımyl departamenti bastyǵynyń orynbasary Sarqytbaı Qusaıynov.