Ǵanı Beısembaev aýyl mektepteriniń sapasyn arttyrý boıynysha júrgizilip jatqan jumystardyń nátıjesimen bólisti.
Ásirese, Aqtóbe oblysynda júzege asyrylǵan «Tirek mektebi – shaǵyn jınaqty mektep» modeli tıimdiligin kórsetti, dep habarlaıdy aqshamnews.kz Oqý-aǵartý mınıstrliginiń baspasóz qyzmetine silteme jasap.
Joba nátıjesi 2023 jylmen salystyrǵanda shaǵyn jınaqty aýyl mektepterindegi bilim sapasy orta eseppen 7 paıyzǵa artqanyn kórsetti. Oblysta sıfrlyq bilim berý ekojúıesi qalyptasyp, sapaly ınternetke qol jetkizý máseleleri sheshildi. Osyǵan baılanysty Oqý-aǵartý mınıstrligi ony elimizdiń barlyq óńirlerinde keńeıtýdi usynyp otyr.
«Joba aıasynda Aqtóbe oblysynda júrgizilgen keshendi jumystar shaǵyn jınaqty mektepterdegi bilim sapasynyń artýyna yqpal etti. Oqý-aǵartý mınıstrligi ulttyq úılestirýshi retinde aýyl mektepteriniń damý strategıasyn ázirledi. Endi ákimdikter strategıa negizinde jobany masshtabtaý jumystaryn kezeń kezeńimen iske asyrýdy qamtamasyz etýi qajet», - dep qorytyndylady mınıstr.
Aıta ketý kerek, bıylǵy jyly jobaǵa Aqmola, Qostanaı, Pavlodar, Batys Qazaqstan jáne Soltústik Qazaqstan oblystaryndaǵy 10 tirek jáne 30 shaǵyn jınaqty mektep tartylýda. 2025 jyldyń qańtarynan bastap jobaǵa 17 óńirdiń 192 tirek jáne 759 shaǵyn jınaqty mektebi qatysady. Al úshinshi kezeńde osy jobaǵa qalǵan shaǵyn jınaqty mektepterdiń barlyǵy tolyǵymen qamtylýy tıis.