«Qazaeronavıgasıa» RMK Kásibı daıyndaý ortalyǵynda 15 qarashada jańa oqý-jattyǵý qurylǵysy kesheni iske qosyldy.
Ol áýe qozǵalysyna qyzmet kórsetý dıspecherleriniń alǵashqy daıyndyǵy men jattyǵýlaryn ótkizýge arnalǵan, dep habarlaıdy aqshamnews.kz Kólik mınıstrligine silteme jasap.
AQSH óndirisiniń «Air Traffic Simulation and Voice Technologies» jattyǵý keshenin «Qazaeronavıgasıa» RMK tapsyrysy boıynsha áýe qozǵalysyn basqarýdy modeldeý júıesin álemdik ázirleýshi UFA Inc. qurǵan.
Ol bolashaq dıspecherlerdiń bastapqy daıarlaýdan ótip qana qoımaı, jumys isteıtin dıspecherlerdiń kásibı deńgeıin arttyrýǵa múmkindik beredi.
Keshenniń tehnıkalyq múmkindikteri áýeaılaqtaǵy áýe trafıgi men jerdegi jaǵdaıdy ımıtasıa jasaýǵa múmkindik beredi.Al jasandy ıntellekt oqý barysynda pılotty almastyra alady jáne radıobaılanysqa JI shyǵady. Sondaı-aq keshenniń fýnksıasyna vırtýaldy shynaıylyqty modeldeý kiredi, bul avıadıspecherdiń shynaıy jumys ornyn barynsha qaıtalaýǵa múmkindik beredi.
Jańa oqý-jattyǵý qurylǵysy kesheni júıesine júktelgen aeronavıgasıalyq kartalar Respýblıkanyń qoldanystaǵy áýeaılaqtary men áýe keńistigin ımıtasıalaıdy. Qazirgi tańda bul jabdyqqa Qazaqstanda da, Orta Azıada da balama joq.
2023 jyldyń qorytyndysy boıynsha «Qazaeronavıgasıa» RMK Kásibı daıyndaý ortalyǵynda 291 adam jattyǵý kesheninde daıarlaýdan ótti. Aǵymdaǵy jyldyń 9 aıynda osyndaı daıyndyqtan 192 adam ótti. Jańa trenajer Ortalyq nusqaýshylaryna bolashaq jáne jumys istep turǵan áýe qozǵalysyna qyzmet kórsetý dıspecherlerin eki ese kóp oqytýǵa múmkindik beredi.
Aıtalyq, Kásibı daıyndaý ortalyǵy IKAO TRAINAIR PLUS Gold baǵdarlamasynyń tolyqqandy qatysýshysy mártebesine ıe Qazaqstan Respýblıkasyndaǵy jalǵyz avıasıalyq oqý ortalyǵy. Búginde KDO basshylyǵy óz aldyna IKAO TRAINAIR PLUS Platinum mártebesine qol jetkizý jáne Qazaqstannyń ǵana emes, Ortalyq Azıa men TMD-nyń avıasıa sektoryndaǵy jetekshi oqý ortalyǵyna aınalý mindetin qoıyp otyr