Zaýyt salý máselesi 2021 jyldan beri sozylyp keledi.
Ortalyq komýnıkasıalar qyzmetinde ótken brıfıńte QR Ekologıa jáne tabıǵı resýrstar mınıstrligi Qaldyqtardy basqarý jónindegi memlekettik saıasat departamentiniń dırektory Mansur Oshýrbaev alty oblysta qoqysty órteý zaýyttaryn salý jobasy toqtatylǵanyn aıtty, dep habarlaıdy Almaty-akshamy.kz
Vedomstvo ókiliniń aıtýynsha, Qazaqstanda qoqysty órteý zaýyttaryn salý máselesi 2021 jyldan beri sozylyp keledi.
"Josparlanǵan alty qoqys órteıtin zaýyt qurylysyn júzege asyrýda belgili bir qıyndyqtar bar. Rasynda da utyp alǵan kompanıa bul jobany júzege asyrýdy toqtatýǵa nıet bildirdi. Iaǵnı, aýksıonda dál osy alty zaýyt ótti, olardyń qurylysy júrgizilmeıdi. Joba toqtatyldy", dedi Mansýr Oshýrbaev.
Departament dırektory jobany qaı qalalarda júzege asyrý josparlanǵanyn eske saldy. Olar: Astana, Almaty, Shymkent, Atyraý, Taraz jáne Aqtóbe.
Ol sonymen qatar qaldyqtardy jaǵý tarıfteri máselesi áli pysyqtalyp jatqanyn aıtty.
2020 jyldyń kúzinde Qazaqstan qalalarynda qoqysty órtep, ony elektr qýatyna óńdeıtin zaýyttar salynady degen aqparat paıda boldy. Bul ıdeıaǵa sol kezdegi QR Ekologıa, geologıa jáne tabıǵı resýrstar mınıstri Maǵzum Mırzaǵalıev úlken úmit artqanymen, keıinnen ekologtar qarsy shyqty.