Bul salada 68,9 myń adam eńbek etedi.
Agroónerkásip salasyndaǵy jalaqynyń satyp alý qabileti bir jylda nebári 4%-ǵa ósti, al búkil Qazaqstan boıynsha bul kórsetkish 9%-ǵa jýyq joǵarylady, dep habarlaıdy Almaty-akshamy.kz Finprom.kz saıtyna silteme jasap.
2021 jyldyń tórtinshi toqsanynda Qazaqstanda ortasha aılyq ataýly jalaqy* 275,6 myń teńgeni qurady. Bul rette eń tómengi jalaqy - 167,3 myń teńgeni aýyl, orman jáne balyq sharýashylyǵy salasynyń jumysshylary aldy, bul respýblıkalyq ortasha deńgeıden 39,3%-ǵa az.
Sonymen qatar, aýyl, orman jáne balyq sharýashylyǵy salasyndaǵy jalaqynyń satyp alý qabiletiniń ósimi 2020 jyldyń tórtinshi toqsanymen salystyrǵanda Qazaqstan Respýblıkasy boıynsha ortasha kórsetkishten eki esege az: tıisinshe 4,2% nemese 8,7%.
* osy jerde jáne budan ári qaraı – kásipkerlikpen aınalysatyn shaǵyn kásiporyndardy qospaǵanda
Agroónerkásiptik salasy qurylymynda ortasha aılyq jalaqy segmentke baılanysty aıtarlyqtaı ózgeredi. Eń joǵary jalaqy kórsetkishi - 212,5 myń teńge orman sharýashylyǵy jáne aǵash kesý salasynda baıqalady. Odan keıingi orynda egin jáne mal sharýashylyǵy – bar bolǵany 166,2 myń teńge, al balyq jáne akvamádenıet sharýashylyǵynda odan da tómen, nebári 98,6 myń teńge.
Qazaqstan Respýblıkasynyń óńirleri arasynda aýyl, orman jáne balyq sharýashylyǵy salasyndaǵy eńbekaqy Mańǵystaý oblysynda 42,5 myń teńgeden bastalyp, Nur-Sultan qalasynda (munda sektordyń barlyq negizgi sheneýnikteri men bas keńseler jáne iri kompanıalar ornalasqan, biraq jumys isteıtin fermerlerdiń ózderi emes) 307,6 myń teńge aralyǵynda bolyp otyr.
Sonymen qatar, 2021 jyldyń tórtinshi toqsanynda aýyl, orman jáne balyq sharýashylyǵy salasyndaǵy qyzmetkerlerdiń sany tizim boıynsha 68,9 myń adamǵa jetken.
Onyń ishinde 66,1 myń adam ósimdik sharýashylyǵy men mal sharýashylyǵynda, 2,3 myń adam orman jáne aǵash kesý salasynda, 500-ge jýyq adam balyq jáne akvamádenıet salasynda eńbek etedi.
Jalpy, 2021 jylǵy qańtar-jeltoqsanda saladaǵy ortasha aılyq ataýly jalaqy 150 myń teńgeni qurady, al jalaqynyń satyp alý qabileti 2020 jylmen salystyrǵanda 5,9%-ǵa ósken.