Almaty ákimi Erbolat Dosaev Almaly aýdanynyń ózekıi máselelerimen tanysty, dep habarlaıdy Almaty-akshamy.kz.
Qala basshysy jumys saparyn qalalyq revmatologıalyq ortalyqty aralaýdan bastady. Bul - revmatologıalyq aýrýlary bar naýqastarǵa arnalǵan eldegi jalǵyz mamandandyrylǵan medısınalyq mekeme.
Aýrýhanaǵa jatý kezeginde elimizdiń túkpir-túkpirinen 532 adam tur. Ótken ǵasyrdyń 40-shy jyldarynda salynǵan ortalyq ǵımaratynyń ózi keńeıtý men jóndeýdi qajet etedi. E.Dosaev jaıly qalalyq orta jáne jer qatynastary basqarmalaryna ǵımaratty kúrdeli jóndeý qajettiligi týraly máselelerdi pysyqtaýdy, sondaı-aq burynǵy ǵımarattyń ornyna jańa korpýs salý boıynsha usynystar engizýdi tapsyrdy.
Túrkebaev kóshesi, 93 mekenjaıynda ornalasqan №144 mektepte oqýshy oryndarynyń tapshylyǵyn joıý úshin 300 balaǵa arnalǵan korpýstyń qurylysy aıaqtaldy. Aǵymdaǵy jyldyń naýryz aıynda Brýsılovskıı kóshesi, 15 mekenjaıyndaǵy №34 gımnazıada 550 oryndyq jańa korpýsty iske qosý josparlanýda. Jaıly qalalyq orta jáne bilim berý basqarmalaryna «Orta jáne mektepke deıingi bilim berý obektilerin renovasıalaý» baǵdarlamasyn qabyldaý qajettiligi máselesin zerdeleý tapsyryldy.
Aralaý barysynda qala basshysy №2 Oqýshylar úıine bardy. 1936 jyly salynǵan qańqaly-qamysty qurylys ǵımaraty apatty jaǵdaıda tur. Búginde úıirmelerge kún saıyn 800-den astam bala qatysady. Almaty ákimi jaıly qalalyq orta, qalalyq josparlaý jáne ýrbanıstıka, bilim basqarmalaryna qoldanystaǵy ǵımarattyń ornyna jańa ǵımarat salý máselesin qarastyrýdy tapsyrdy.
Aýdandy aralaý barysynda Almaty ákimi Shevchenko - Manas - Jambyl - Baızaqov kósheleriniń sharshysyndaǵy eski úılerdiń turǵyndarymen kezdesti. E.Dosaev úıler men ınjenerlik jelilerdiń jaǵdaıyna tehnıkalyq aýdıt júrgizýdi tapsyrdy.
Jumys saparynyń sońynda esirtki qylmystary men jasóspirimder arasyndaǵy nashaqorlyqtyń aldyn alýǵa baǵyttalǵan «NarkoStop» áleýmettik jobasynyń avtorlarymen jáne eriktilermen tanysty. Pılottyq joba 2021 jyldyń qazan aıynda Almaly aýdany ákiminiń qoldaýymen jáne Almaty qalasy polısıa departamenti men qoǵam belsendileriniń qoldaýymen iske qosyldy. Qala ákimi qoǵamdyq damý basqarmasyna áleýmettik bastamaǵa qoldaý kórsetip, megapolıstiń basqa aýdandary boıynsha jobany «kóbeıtý» múmkindigin qarastyrýdy tapsyrdy.
Aralaý qorytyndysy boıynsha qala basshysy E.Dosaev Almaly aýdanynyń ákimi E.Seıtenovtiń jumysyn maquldady jáne áleýmettik ınfraqurylymdy odan ári damytý jáne ózekti máselelerdi sheshý boıynsha jumysty jalǵastyrýdy tapsyrdy.