Naýqastar sany jyl sanap kóbeıip jatyr.
Dárigerlerdiń aıtýynsha, naýqastardyń basym bóligi aýrýǵa shaldyqqanyn baıqamaı qalady eken, dep habarlaıdy Almaty-akshamy.kz
400 myńnan asa qazaqstandyq birinshi jáne ekinshi tıptegi qant dıabetimen aýyrady.
Jyl saıyn naýqastardyń sany shamamen 20-30 myń adamǵa kóbeıip jatyr. Bul týraly Dúnıejúzilik qant dıabetine qarsy kúres kúnine arnalǵan Ulttyq konferensıa barysynda aıtyldy.
Sarapshylardyń pikirinshe, naýqastardyń sany jyldam ósip jatyr. Sol úshin derttiń aldyn alýǵa jumylý kerek. Sonymen qatar sýsamyr derti jaıly aqparattandyrýdy qolǵa alyp, aldyn alý amaldaryn júzege asyrý mańyzdy. Óıtkeni naýqastardyń basym bóligi aýrýǵa shaldyqqanyn baıqamaı qalady.
Qazir Densaýlyq saqtaý mınıstrligi stýdent jáne júkti naýqastardy dárimen qamtamasyz etý máselesin pysyqtap jatyr.
"Búgingi kúni júkti áıelder men kúndizgi bólimde oqıtyn stýdent naýqastardyń sanyn eseptep jatyrmyz. Bul sanatta shamamen 400 adam bar. Sebebi qant dıabetimen aýyratyn naýqastardyń birazy 18 jasqa tolmaǵan. Olardyń sany – 6 myń. Onyń ústine bári birdeı kúndizgi bólimde oqymaıdy", - deıdi DSM Medısınalyq kómekti uıymdastyrý departamenti basqarmasynyń basshysy Gúlnár Maqsutova.