Qazaqstan 20-dan asa otandyq áýejaıdy eýropalyq ınvestorlardyń basqarýyna berýge daıyn. Elimizdiń Kólik mınıstri Marat Qarabaev osylaı dedi, - dep habarlaıdy almaty-akshamy.kz.
Vedomstvonyń baspasóz qyzmetiniń málimetinshe, Brússelde ótken Global Gateway ınvestısıalyq forýmynyń ashylý saltanatynda mınıstr Marat Qarabaev Eýroodaq pen Ortalyq Azıa arasyndaǵy turaqty kólik dálizin damytý jóninde sóz sóılegen. Dál osy jerde birqatar otandyq áýejaıdyń ınvestorlar qolyna beriletini aıtyldy.
"Azamattyq avıasıa salasyn damytý jáne kontınenttik tranzıttik hab qurý úshin ınvestorlarǵa otandyq 22 áýejaıdy basqarýǵa berý josparlanǵan", - dedi mınıstr.
Sonymen qosa, kólik mınıstrliginiń basshysy Marat Qarabaev Brússel qalasynda Belgıa premer-mınıstriniń orynbasary Jorj Gılkınemen kezdesti. Kezdesý barysynda Eýropa men Qazaqstan arasyndaǵy kólik dálizderin keńeıtý, sondaı-aq eki eldiń kólik salasyndaǵy uzaq merzimdi ózara tıimdi yntymaqtastyǵyn damytý jáne nyǵaıtý máseleleri talqylandy.