Qoǵam belsendileri, volonterler jáne qarapaıym azamattar zardap shekken jandardy qaýipsiz aımaqqa kóshirýge, gýmanıtarlyq kómekti jınaýǵa jáne jetkizýge, turǵyndarǵa aqparat taratýǵa qatysty birlesken jumysta mańyzdy ról atqaryp otyr, dep jazdy Memlekettik keńesshi Erlan Qarın Telegram paraqshasynda.
Búginde sý tasqynyna qarsy kúreske barlyǵy 20 myńnan astam volonter jumyldyrylǵan. Olardyń basym kópshiligi Aqtóbe, Qostanaı, Batys Qazaqstan, Abaı, Aqmola jáne ózge de oblystardaǵy tótenshe jaǵdaıdar departamentiniń qyzmetkerlerine barynsha járdemdesip jatyr.
Qazaqstan halqynyń Assambleıasy tarapynan da aıtarlyqtaı kómek kórsetilip otyr. Jalpy respýblıka boıynsha qıyn-qystaý jaǵdaıǵa tap bolǵan jandarǵa qoldaý kórsetýge jáne qarǵyn sý saldaryn joıýǵa Assambleıanyń 9 myńnan astam volonteri atsalysyp júr. Barlyq aımaqtardaǵy Dostyq úıinde eriktiler ortalyǵy jáne gýmanıtarlyq kómekti qabyldaý oryndary uıymdastyryldy. Etnomádenı birlestikterdiń ókilderi zardap shekken adamdardy azyq-túlikpen, ystyq tamaqpen, kıim-keshekpen, qajetti zattarmen jáne tehnıkamen qamtamasyz etip otyr.
Qazirgi tańda Assambleıa tarapynan berilgen qaıyrymdylyq jáne gýmanıtarlyq kómektiń kólemi 110 mıllıon teńgeden asty. Elimizdegi volonterlik uıymdardyń jumysyn úılestirý – mańyzdy mindettiń biri. Muny «Amanat» partıasynyń «Jastar rýhy» jastar qanaty óz moınyna aldy. Aýqymdy fılıaldar jelisi jáne memlekettik organdarmen jumys isteý tájirıbesi bar «Jastar rýhy» erikti qutqarýshylardy jınaý, gýmanıtarlyq kómekti suryptaý jáne jetkizý jumysyn tıimdi atqaryp otyr. Búgin birqatar iri volonterlik birlestiktiń ókilderimen kezdestik. Kúndelikti uıymdastyrý máselelerin talqylap, buryn-sońdy bolmaǵan sý tasqynynyń saldaryn joıý úshin birlese jumys júrgize berýge ýaǵdalastyq, - dep jazdy Erlan Qarın óziniń telegram kanalynda.