Qaterli isikke shaldyqqandar shetel aspaı-aq, qurylǵy kómegine júgine alady
Búgin Qazaq onkologıa jáne radıologıa ǵylymı-zertteý ınstıtýtynda ashylǵan biregeı tomoterapıa ortalyǵy álemniń nebári 8 elinde ǵana qoljetimdi. Qaterli isik aýrýyn emdeýde sáýlelik terapıa júrgizetin qurylǵynyń arqasynda dertine daýa izdegen naýqastar endi elimizde de emdele alady. Munda kúnine 100 adam, jylyna 12 myńǵa deıin adam qabyldaý múmkindigi bar. Aıta keteıik, barlyq shyǵyndy mindetti áleýmettik saqtandyrý qory óteıdi. Joba ınvestory – túrkıalyq kompanıa, dep habarlaıdy Almaty-akshamy.kz.
«Bul qurylǵynyń múmkindikteri óte kóp. Tomoterapıa, gammo, kıber pyshaq fýnksıacy qarastyrylǵan. Bizdiń mamandar 1 aı boıy arnaıy oqytý kýrstarynan ótip, naýqastardy qabyldaýǵa daıyndalady. Otandyq medısına salasy úshin bul úlken jetistik dep sanaımyn»,– dedi Qazaq onkologıa jáne radıologıa ǴZI basqarma tóraıymy Dılára Qaıdarova.
Elimizdiń Syrtqy ister mınıstrligi, Qazaqstannyń Túrkıadaǵy elshiligi ókilderi, sheteldik ınvestorlardan quralǵan delegasıa kelesi kezekte Indýstrıaldy aımaqtan boı kóteretin jańa zaýyttyń irgetasyn qalady. Sendvıch-panelder óndirý zaýyty jylyna 1 mıllıon sharshy metrge deıin ónim shyǵarýǵa nıetti. Joba quny – 3,7 mıllıard teńge, munda 100-ge jýyq jumys orny ashylady dep kútilýde.
Indýstrıaldy aımaqta negizi qalanǵan metal qorshaýlar shyǵaratyn zaýyt 2023 jyly paıdalanýǵa berilip, 25 jańa jumys ornymen qamtamasyz etpek. Kásiporyn jylyna 12 myń tonna jol qorshaýlaryn jáne 15 myń tonna ystyq myryshtaý buıymdaryn óndirýge qaýqarly.
Aıta ketý kerek, búginde Qazaqstanda Túrkıadan kelgen ınvestorlardyń qatysýymen 50-den astam ınvestısıalyq joba sátti júzege asyrylǵan.