Sý resýrstary jáne ırrıgasıa mınıstrliginiń apparat jınalysynda sý tasqyny kezeńine daıyndyq jumystary pysyqtaldy.
Búgingi tańda elimizdegi sý qoımalarynda bos oryndar daıyndalyp jatyr, dep habarlaıdy aqshamnews.kz.
Máselen, Astana sý qoımasyndaǵy sý kólemi 83%-ǵa deıin tómendetildi. 20-shy jeltoqsannan beri 5,06 mln tekshe metr sý jiberildi. Mınıstrlik 2025 jylǵy 1 sáýirge deıin qoımadaǵy sý kólemin 300 mln tekshe metrge nemese 73%-ǵa deıin azaıtýdy josparlap otyr.
Aqtóbe sý qoımasynda 51 mln tekshe metrge jýyq sý bar. 1 sáýirge deıin 47,32 mln tekshe metrge deıin azaıtý josparlap otyr. Al, Batys Qazaqstan oblysyndaǵy Bitik qoımasyndaǵy sý kólemi 34,45 mln tekshe metrge deıin azaıtyldy. Búgingi tańda sý qoımasynan sekýndyna 8,3 tekshe metr sý jiberilip jatyr.
Shyǵys Qazaqstan oblysyndaǵy Buqtyrma sý qoımasy 79% toly. Mınıstrlik 1 sáýirge deıin qoımadaǵy sý kólemin taǵy 8%-ǵa azaıtýǵa nıetti. Qaraǵandy oblysyndaǵy Yntymaq sý qoımasynda 69 mln tekshe metr sý bar. Kóktemde tasqyn sýyn qabyldaý úshin sý qoımasyn 39%-ǵa deıin bosatý josparlanyp otyr.
Ulytaý oblysyndaǵy Keńgir qoımasyndaǵy sý kólemi 86%-ǵa azaıtyldy. Kóktemge deıin taǵy 11%-ǵa jýyq bosatý josparda bar. Qostanaı oblysyndaǵy Joǵarǵy Tobyl sý qoımasynda 585,4 mln tekshe metr sý bar. Sý qoımasynyń jumys rejımine sáıkes 1 sáýirge deıin sý kólemin 499,37 mln tekshe metrge nemese 61%-ǵa deıin azaıtý kútilýde.
«Kóktemde tasqyn sýyn qoımalarǵa jınap qana qoımaı, kólder júıesine, tabıǵı jaıylymdar men shabyndyqtarǵa baǵyttaý óte mańyzdy. Sol sebepti sýdy saýatty bólý jumysyn aldyn-ala josparlaý qajet. Bıyl sharýalar men basqa da sý paıdalanýshylardyń suranystary tolyq qanaǵattandyryldy. Ótken sýarý kezeńinde elimizdiń sharýa qojalyqtaryna shamamen 11 mlrd tekshe metr sý berildi. Budan bólek úlken jáne shaǵyn sý aıdyndaryn saqtaý jáne qalpyna keltirý boıynsha úlken jumys atqaryldy»,- dedi Sý resýrstary jáne ırrıgasıa mınıstri Nurjan Nurjigitov.