Ekonomıkanyń salalary boıynsha eń kóp zardap shekkender taý-ken metalýrgıa kesheniniń ónerkásipterinde
Eńbek jáne halyqty áleýmettik qorǵaý mınıstrliginiń Eńbek jáne áleýmettik qorǵaý komıtetiniń málimeti boıynsha 2022 jyldyń qorytyndysy boıynsha óndiristegi jazataıym oqıǵalardan 1465 jumysker zardap shekti, onyń 203-i qaza tapty, dep habarlaıdy Almaty-akshamy.kz.
Eńbek jáne áleýmettik qorǵaý mınıstrliginiń málimdeýinshe, bul rette 2022 jyldyń qorytyndysy boıynsha óndiristik jaraqat 2021 jyldyń deńgeıinde saqtaldy.
2022 jyly óndiristik jaraqattaný koefısıenti (1000 jumyskerge shaqqandaǵy jazataıym oqıǵalardyń jıiligi) 0,22 qurady.
Respýblıkanyń óndiristik aımaqtarynda jaraqat alýdyń eń joǵary deńgeıi saqtalýda. Máselen, Qaraǵandy oblysynda - 180 adam, SHQO-da – 169 adam, Qostanaı oblysynda – 142 adam, Pavlodar oblysynda – 112 adam, Aqtóbe oblysynda – 103 adam, Almaty qalasyed. – 114 adam zardap shekti.
Ekonomıkanyń salalary boıynsha eń kóp zardap shekkender taý-ken metalýrgıa kesheniniń ónerkásipterinde – 16,2 % jáne qurylys salasynda – 15 %.
Jazataıym oqıǵalardyń oryn alýynyń negizgi sebepteri: jábirlenýshiniń óziniń óreskel abaısyzdyǵy (33,9%); óndiristegi jumystyń tıisti deńgeıde uıymdastyrylmaýy (29%); jol qozǵalysy erejelerin buzý (9,4%); qaýipsizdik jáne eńbekti qorǵaý erejelerin buzý.
Qaýipsiz eńbek jaǵdaıyn jasaý men óndiristik jaraqattanýdy azaıtý QR Úkimeti men Eńbek jáne halyqty áleýmettik qorǵaý mınıstrliginiń (budan ári-Mınıstrlik) negizgi mindetteriniń biri bolyp tabylady.
Sońǵy bes jyldyń ishinde memlekettik organdar men jumys berýshilerdiń eńbekti qorǵaý salasy boıynsha qabyldanǵan keshendi sharalardyń nátıjesinde óndiristik jaraqattaný deńgeıi 6,5%-ǵa tústi.
Profılaktıka men buzýshylyqty aldyn alý maqsatynda elimizdiń 2800 kásiporny qaýipsizdik pen eńbekti qorǵaý standarttaryn engizdi.
Sondaı-aq, Qazaqstan Respýblıkasynyń Kásipodaqtar federasıasymen birlesip, múgedektigi bar adamdardy «halyqtyq baqylaýshy» retinde tartýdy kózdeıtin «Halyqtyq baqylaý» áleýmettik mańyzdy jobasy engizilýde. Búgingi kúni jobany júzege asyrýǵa respýblıkanyń 240 kásiporny qosylyp, onda 600-den astam jumysker ishki baqylaýdy júzege asyrýda.
2019 jyldan bastap Mınıstrlik tarapynan «Nóldik jaraqat - Vision Zero» tujyrymdamasyn jetildirý bolıynsha belsendi jumys atqarylýda. Oǵan búginde 332 kásiporyn qosyldy.
Sonymen qatar, «Onlaın eńbek konsýltanty» elektrondy servısi iske qosyldy. Ol jumysker men jumys berýshiniń arasynda qashyqtyqtan ózara árekettesýdi qamtamasyz etý úshin eńbek zańnamasynyń saqtalýynyń tıimdiligin arttyrýǵa múmkindik beredi. Servıs jumys berýshiniń eńbekti qorǵaý talaptarynyń saqtalýyn ózindik tekserýden ótýin qarastyrady. Servıs iske qosylǵaly beri 13 854 jumys berýshi ony paıdalandy.