Reestrde 7 jyl boıy «bankrot» degen mártebe tirkelip turady.
«Bankrot» atanǵan adam 5 jyl boıy kredıt ala almaıdy, dep habarlaıdy Almaty-akshamy.kz Baq.kz-ke silteme jasap.
Ortalyq komýnıkasıalar qyzmeti alańynda ótken brıfıńte Qarjy vıse-mınıstri Erjan Birjanov azamattarǵa bankrottyqtyń qandaı saldary bolatynyn túsindirip berdi.
Sot bankrottyǵyn jáne sottan tys bankrottyq rásimderin qoldanatyn azamattar:
• 5 jyl ishinde bankterden jáne mıkroqarjy uıymdarynan kredıtter ala almaıdy (lombardtardyń mıkrokredıtterin alýdan basqa);
• olar 7 jyldan keıin ǵana qaıta bankrottyqqa júgine alady;
• olardyń qarjylyq jaǵdaıy bankrottyqtan keıin úsh jyl boıy tekseriledi.
Tólem qabilettiligin qalpyna keltirý kezinde mundaı saldar bolmaıdy. Sondyqtan azamat ózin bankrot dep jarıalamas buryn, yqtımal saldary men shekteýler týraly oılaný kerek, - dep túsindirdi vıse-mınıstr OKQ-da.
Birjanov qazaqstandyqtarǵa taǵy bir máseleni eskertti.
Reestrde 7 jyl boıy «bankrot» degen mártebe tirkelip turady. Bankter jáne basqa da uıymdar bul aqparatty ala alady. Sondaı-aq ony keńinen paıdalana alady dep oılaımyn. Sebebi 7 jyldan keıin bankrottyq mártebesi ótse de, bank 7-10 jyldan keıin kredıt berý ne basqa másele boıynsha azamat týraly málimetti alyp, oń emes sheshim qabyldaýy da múmkin, - dep aıtty ol.
Qarjy vıse-mınıstri azamattarǵa bankrottyq sońǵy sheshim bolýy keregin taǵy bir márte eskertti.
Sonymen qatar Birjanov azamat ózin bankrot dep jarıalaýǵa ózi ǵana sheshim qabyldaýy keregin aıtty. Sózinshe, bankter nemese kredıtorlar jeke tulǵany «bankrot» dep taný úshin esh jerge aryz bere almaıdy.
Boryshkerdiń ózi ǵana ózin bankrot dep tanı alady;
Sot bankrottyǵy kezinde kredıtorlardyń múddeleri boryshkerdiń múlkine baǵyttalǵan;
Sot bankrottyǵynyń kez kelgen kezeńinde boryshker men kredıtorlar qaryzdardy erikti túrde tóleý týraly bitimgershilik kelisim jasasýǵa quqyly.
Boryshker bankrottyqqa deıin 3 jyl ishinde kredıtorlar aldyndaǵy mindettemelerdi oryndaýdan jaltarý máselesin tekseredi: múlikti satty, syıǵa tartty, jasyrdy nemese joıdy;
Tólem qabilettiligin bes jyldan az ýaqyt ishinde qalpyna keltirýge bolady.