Tizimde 289 kadastrlyq kod bar.
Aýyl sharýashylyǵy mınıstriniń 2022 jylǵy 17 qazandaǵy buıryǵymen jer ýchaskeleriniń kadastrlyq nómirlerin qalyptastyrý maqsatynda oblystarǵa, respýblıkalyq mańyzy bar qalalarǵa, astanaǵa, aýdandarǵa beriletin kodtardyń tizbesine ózgerister engizildi, dep habarlaıdy Almaty-akshamy.kz
Atap aıtqanda, tizimge jańa oblystardyń kodtary qosyldy.
Abaı oblysyna 23, Jetisý oblysyna 24, Ulytaý oblysyna 25 degen nómir berildi.
Qazaqstanda 2022 jylǵy 8 maýsymda Memleket basshysynyń «Qazaqstan Respýblıkasynyń ákimshilik-aýmaqtyq qurylymynyń keıbir máseleleri týraly» Jarlyǵy kúshine endi.
Qujatqa sáıkes úsh jańa oblys quryldy:
Shyǵys Qazaqstan oblysynyń quramynan Aqsýat, Abaı, Aıagóz, Besqaraǵaı, Borodýlıha, Jarma, Úrjar, Kókpekti aýdandaryn, Semeı jáne Kýrchatov qalalaryn bólý jolymen ákimshilik ortalyǵy Semeı qalasynda ornalasatyn Abaı oblysy;
Almaty oblysynyń quramynan Aqsý, Alakól, Eskeldi, Qaratal, Kerbulaq, Kóksý, Panfılov, Sarqan aýdandaryn, Taldyqorǵan jáne Tekeli qalalaryn bólý jolymen ákimshilik ortalyǵy Taldyqorǵan qalasynda ornalasatyn Jetisý oblysy;
Qaraǵandy oblysynyń quramynan Jańaarqa, Ulytaý aýdandaryn, Jezqazǵan, Qarajal jáne Sátbaev qalalaryn bólý jolymen ákimshilik ortalyǵy Jezqazǵan qalasynda ornalasatyn Ulytaý oblysy qurylsyn.