Dostyq úıinde Qazaqstan halqy Assambleıasynyń «Assambleıa TV» telearnasynyń tanystyrylymy ótti.
Jıynda etnomádenı birlestikterdiń ókilderi telearna kontenti men múmkindikterin talqylap, kórermender suranysyna oraı usynystaryn bildirdi, dep habarlaıdy Almaty-akshamy.kz.
Jalpy «Assambleıa TV» telearnasy ótken jyldyń qyrkúıek aıynan bastap Aqparat jáne qoǵamdyq damý mınıstrliginiń qoldaýymen kórermenge jol tartty. Ol «Qazaqtelekom» AQ telekomýnıkasıalyq kompanıasynyń platformasynda iD TV kabeldik teledıdar paketinde taratylady, sondaı-aq «TV+» mobıldi qosymshasynda qoljetimdi.
«Assambleıa TV» maqsaty – Qazaqstan halqynyń birligi men kelisimin qalyptastyrýda jetekshi telearna bolý. Al basty mindeti etnomádenı birlestikterdiń qyzmetin jáne etno salasyndaǵy memlekettik saıasat máselelerin jarıalaý bolyp tabylady. Telearna úlken múmkindikterge jol ashpaq. Ásirese etnosaralyq tatýlyqty nyǵaıtatyn memlekettik tildiń mańyzyn arttyrýǵa septigin tıgizetinine senimdimiz», – dedi Etnosaralyq qatynastar komıtetiniń múshesi Meıirjan Nuradınov.
Telearna efırinen QHA jańalyqtary, mádenı, oıyn-saýyq baǵdarlamalary, Qazaqstanda turatyn etnomádenı birlestikterdiń arnaıy jobalary kórsetiledi.
«Telearna tek ortalyqtarmen shektelip qoımaı, aýyl-aımaqtarǵa da taratylyp, ondaǵy turǵyndarǵa qoljetimdi bolý kerek. Túrli etnos ókilderi óńirlerde, aýyldarda turady. Árbir ulttyń óz mádenıeti, salt-dástúri bar, olar osy arna arqyly nasıhattalýy qajet», – dedi Qazaqstan halqy Assambleıasy depýtattyq tobynyń múshesi Zákirjan Kýzıev.
Sondaı-aq jıynda Qyrǵyz etnomádenı birlestiginiń tóraǵasy Shavkat Ismaılov, Astana qalasy QHA Analar keńesiniń múshesi Turar Sattarqyzy arna jumysyna qatysty birqatar usynystar aıtty.