Bul tehnologıany EUÝ ǵalymdary oılap tapty.
Qazaqstanda alǵash ret radıasıalyq modıfıkasıalanǵan kabelder shyǵarylady, dep habarlaıdy Almaty-akshamy.kz Ǵylym jáne joǵary bilim mınıstrliginiń baspasóz qyzmetine silteme jasap.
Gýmılev atyndaǵy Eýrazıa ulttyq ýnıversıteti janyndaǵy "Iadrolyq tehnologıalar parki" AQ óndirýshilermen birlese radıasıalyq-modıfıkasıalanǵan oqshaýlaý qabaty bar munaı-sýasty jáne fotovoltaıkalyq kabelderdiń alǵashqy qazaqstandyq óndirisin jolǵa qoıýdy josparlap otyr.
EUÝ ǵalymdary sheteldik áriptesterimen birlese ınertti ortada josparlanǵan óńdeý tehnologıasyna ózgerister engizip, kabeldik ónimniń paıdalaný qasıetterin jaqsartqan. Bul óndiris ádisi bizdiń elde qoldanylmaıdy.
Kabelderdiń basty artyqshylyǵy – joǵary temperatýraǵa tózimdilik.
"Kabeldik-ótkizgish ónimderin jasaıtyn jergilikti óndirýshiler tek oqshaýlaǵysh qabatty peroksıdti biriktirý ádisin qoldanady. Biz "Qazelektromash" JSHS-men birlesip, Qazaqstanda birinshi bolyp radıasıalyq-modıfıkasıalanǵan oqshaýlaý qabaty bar kabeldik ónimniń munaı-sýasty jáne fotovoltaıkalyq túrin shyǵaramyz. Bul oqshaýlaǵysh polımerdegi gel-fraksıanyń quramyn arttyrady jáne kabel-ótkizgish ónimderiniń fızıkalyq-mehanıkalyq sıpattamalaryn - ystyqqa tózimdilikti (teris jáne oń temperatýralarǵa), agressıvti ortaǵa tózimdilikti (siltili, qyshqyldyq orta) jáne radıasıaǵa tózimdilikti jaqsartýǵa múmkindik beredi", - deıdi "Iadrolyq tehnologıalar parki" AQ ınjener-fızıgi, joba jetekshisi Azat Nurqasymov.
Radıasıalyq modıfıkasıalanǵan oqshaýlaǵysh qabaty bar munaı-sýasty jáne fotovoltaıkalyq kabel paıdaly qazbalardy jáne balamaly energıa kózderin óndirýge arnalǵan.
Ǵalymdar ǵylymı jobany komersıalandyrýdy josparlap otyr. Óndiristi 2023 jyldyń birinshi jartyjyldyǵynda iske qosý kózdelgen.