13-17 qańtar aralyǵynda Astanada alǵash ret IZhO – 2025 matematıka, fızıka jáne ınformatıka pánderinen Respýblıkalyq fızıka-matematıka mektebi men QR Oqý-aǵartý mınıstrliginiń «Daryn» RǴPO uıymdastyrýymen XXI Halyqaralyq Jáýtikov olımpıadasy ótedi.
Oǵan Qazaqstan, Qyrǵyzstan, Ózbekstan, Túrikmenstan, Tájikstan, Reseı, Belarýs, Armenıa, Ázirbaıjan, Túrkıa, Grýzıa, Bolgarıa, Rýmynıa, Serbıa jáne Mońǵolıa sekildi álemniń 15 elinen 700-ge jýyq oqýshy men 150 jetekshi qatysady. Komandalardyń quramy ulttyq pándik olımpıadalardyń qorytyndysy boıynsha anyqtalady, dep habarlaıdy aqshamnews.kz.
Oqý-aǵartý mınıstrliginiń málimetinshe, olımpıada bes kúnge sozylady jáne eki kezeńnen turady. Tapsyrmalar kúrdeliligi boıynsha mamandandyrylǵan synyptar baǵdarlamasyna sáıkes keledi jáne olardy halyqaralyq qazylar alqasy qurastyrdy. Qazylar alqasynyń tóraǵasy belgili qazaqstandyq ǵalym-matematık, profesor, QR Ulttyq Ǵylym akademıasynyń akademıgi Asqar Jumadildaev.
«Matematıka, fızıka jáne ınformatıka pánderinen oqýshylarǵa arnalǵan Halyqaralyq Jáýtikov olımpıadasy elimizde 21-shi ret ótkizilýde. Bıyl ol alǵash ret Astanada ótedi. Qatysýshylar tehnıkalyq jaraqtandyrylýy osy olımpıadany ótkizý sharttaryna tolyq sáıkes keletin Respýblıkalyq fızıka-matematıka mektebi men Astana IT ýnıversıtetiniń aýdıtorıalarynda teorıalyq jáne praktıkalyq kezeńderde óz bilimderin synaıdy», - dep atap ótti «Daryn» RǴPO dırektory Ǵajembek Tursynov.
Jáýtikov olımpıadasynyń qorytyndysy boıynsha qatysýshylar qatysý sertıfıkattary men estelik syılyqtar, al jeńimpazdar men júldegerler – túrli dárejeli dıplomdar, sondaı-aq altyn, kúmis jáne qola medaldarmen marapattalady.
Esterińizge sala keteıik, Halyqaralyq Jáýtikov olımpıadasy 2005 jyldan beri QR Oqý-aǵartý mınıstrliginiń qoldaýymen ótkizilip keledi. Maqsaty - oqýshylar arasynda fızıka-matematıka ǵylymdaryn nasıhattaý, halyqaralyq yntymaqtastyqty damytý, túrli elderdiń mamandandyrylǵan mektepteri arasynda dostyq qarym-qatynas ornatý, tájirıbe almasý, sondaı-aq Qazaqstannyń bilimi men mádenıetin pash etý.