Májilistiń jalpy otyrysynda depýtat Sálimjan Naqpaev Úkimet basshysy Álıhan Smaıylovtyń atyna joldaǵan saýalynda «112» biryńǵaı kezekshi-dıspecherlik qyzmetine qatysty másele kóterdi, dep habarlaıdy QazAqparat tilshisi.
Álemdik tájirıbe kórsetkendeı, jedel qyzmetterdi shaqyrýdyń biryńǵaı nómirin qurý úlken tıimdilikke ıe. «112» nómiri jeke shuǵyl qyzmet emes, qıyn jaǵdaıǵa tap bolǵan elimizdiń azamattarynyń alǵashqy ótinishi boıynsha kez kelgen áreketke daıyn barlyq memlekettik organdar ekenin túsiný qajet. Búginde el aýmaǵynda «101», «102» jáne «103» shuǵyl qyzmetterdiń nómirleri, Tótenshe jaǵdaılar mınıstrligi janyndaǵy «112» qyzmeti jumys isteıdi, sondaı-aq Atyraý, Kókshetaý, Qyzylorda, Óskemen jáne Oral qalalarynda «112» biryńǵaı kezekshi-dıspecherlik qyzmettiń jumys isteýi boıynsha ilki jobalar iske asyrylyp jatyr. Soǵan qaramastan, osy óńirlerde áli kúnge deıin «101», «102» jáne «103» shuǵyl qyzmetteriniń nómirleri qatarlasa jumys isteıdi.
Pılottyq jobalar iske asyrylatyn oblystardyń jergilikti atqarýshy organdarynan alynǵan aqparatqa sáıkes, árbir óńir osy jobany óńirdiń búdjetine jáne jobany iske asyrý tetigin óziniń túsinýine qaraı atqaryp otyr», - dedi S. Naqpaev.
Onyń aıtýynsha, «112» biryńǵaı kezekshi-dıspecherlik qyzmetiniń jumys isteýi boıynsha biryńǵaı normatıvtik quqyqtyq baza joq. Sonymen qatar dıspecherlik quramdy daıyndaý boıynsha standarttar eskerilmegen jáne shuǵyl qyzmetterdiń aqparat júıeleri ıntegrasıalanbaǵan.
«Eń bastysy, qazirge deıin pılottyq jobalar iske asyrylyp jatqan óńirlerde «112» qyzmetin qurýǵa, onyń jumys isteýin úılestirýge, damytýǵa jáne ádisnamalyq qamtamasyz etýge jaýapty ortalyq memlekettik organ aıqyndalmaǵan. Bir sózben aıtqanda, jedel qyzmettiń barlyq fýnksıasyn ortalyqtandyrylǵan túrde atqarýǵa tıis «112» qyzmetiniń tolyqqandy jumys istep ketýine kerekti jaǵdaı jasalmaǵan. Áli kúnge deıin «101», «102», «103» jedel qyzmetteri qatar jumys atqarýda jáne olarǵa búdjet qarajaty jumsalyp keledi», - dedi depýtat.
Osy oraıda ol joǵaryda aıtylǵandardy eskere otyryp, kelesi suraqtarǵa jaýap berýdi surady.
«Jergilikti atqarýshy organdarda «112» biryńǵaı kezekshi-dıspecherlik qyzmettiń jumys isteýine qandaı ortalyq atqarýshy organ jaýapty bolady? «112» biryńǵaı kezekshi-dıspecherlik qyzmetiniń operatorlary úshin standarttar qashan qabyldanady? Operatorlardyń jalaqysy boıynsha másele qashan sheshiledi? Oblystardyń, respýblıkalyq mańyzy bar qalalardyń jáne astananyń jergilikti atqarýshy organdary 2023 jylǵy 1 qańtardan bastap «112» qyzmetiniń úzdiksiz jumys isteýin engizýge daıyn ba?» - dep surady Sálimjan Naqpaev.