Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy Almaty-akshamy.kz
«Zań jobasy memlekettik jastar saıasaty salasyn jetildirýge, qoǵamdyq qatynastardy keshendi retteýdiń tıimdi quqyqtyq negizin qalyptastyrýǵa, jumyspen qamtýdy qamtamasyz etýge, jastardyń damýyna qolaıly jaǵdaı jasaýǵa baǵyttalǵan. Zań jobasymen jumys barysynda depýtattar «jastar» uǵymynyń jas shegin 29-dan 35 jasqa deıin ulǵaıtýǵa baǵyttalǵan túzetý engizdi. Bul - jastardyń áleýmettik belsendiligin arttyrýǵa yqpal etedi. Jergilikti atqarýshy organdarǵa jastarǵa jeńildikpen jalǵa beriletin turǵyn úı tapsyrý jónindegi baǵdarlamany ázirleý jáne iske asyrý boıynsha jańa quzyret berýge baǵyttalǵan túzetýler engizdi», - dedi depýtat Jámılá Nurmanbetova.
Budan basqa, Memleket basshysynyń 2022 jylǵy 1 qyrkúıektegi Qazaqstan halqyna arnaǵan Joldaýyn iske asyrý turǵysynda depýtattar zań jobasy aıasynda áleýmettik blokqa qatysty tıisti túzetýler engizdi.
Osy oraıda bala kútimi boıynsha tólemderdi taǵaıyndaý kezeńiniń uzaqtyǵyn 1,5 jasqa deıin ulǵaıtý, eń tómen bazalyq zeınetaqy mólsherin eń tómen kúnkóris deńgeıinen 70% deıin, eń joǵary bazalyq zeınetaqy mólsherin 120% deıin dáıekti túrde jetkizý, áıelder úshin zeınetkerlikke shyǵý jasyn 2028 jylǵa deıin 61 jas deńgeıinde bekitý, sondaı-aq jasyna baılanysty zeınetaqy tólemderin esepteý úshin tabys shegin 46 eselengen aılyq eseptik kórsetkishten 55 eselengen deńgeıge deıin ulǵaıtý eskerilgen.
«Zań jobasy sheńberinde qaralatyn máseleler aıasynyń keńeıýin eskere otyryp, depýtattar zań jobasynyń taqyrybyn «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» dep ózgertý jóninde usynys engizdi», - dep naqtylady J. Nurmanbetova.