«Qazgeoaqparat» jáne «Qazgeologıa» mekemelerin biriktirý arqyly Ulttyq geologıalyq qyzmet qurylady.
Bul jaıynda «Qazgeoaqparat» respýblıkalyq geologıalyq aqparat ortalyǵy» JSHS bas dırektory Janat Káribaev aıtty, dep habarlaıdy Almaty-akshamy.kz
«Búginde jarǵylyq kapıtalyna 100 paıyz memleket ıelik etken «Qazgeoaqparat» respýblıkalyq geologıalyq aqparat ortalyǵy» JSHS-ni «QR Ulttyq geologıalyq qyzmeti» aksıonerlik qoǵamy etip qaıta qurýdy uıymdastyrý jumystary júrip jatyr. Kelesi kezeńde oǵan «Qazgeologıa» ulttyq geologıalyq barlaý kompanıasy» AQ-ny qosý josparlanǵan», - dedi ol ortalyq komýnıkasıalar qyzmetinde ótken brıfıńte.
Onyń sózinshe, «Qazgeoaqparat» RGAO» JSHS men «Qazgeologıa» AQ-ny biriktirý sheshimi Ulybrıtanıa, Kanada, Fınlándıa sıaqty elderdiń geologıadaǵy tájirıbesin eskere otyryp qabyldanǵan.
Sondaı-aq Janat Káribaev Ulttyq geologıa qyzmetiniń negizgi jumys baǵyttaryn atady. Olar: - jer qoınaýyn utymdy paıdalaný jáne mıneraldyq-shıkizat bazasyn molaıtý salasyndaǵy memlekettik saıasatty iske asyrý;
- jer qoınaýyna geologıalyq zertteý júrgizýdi ǵylymı negizdeý maqsatynda eldiń beıindik joǵary oqý oryndarymen ózara is-qımyl jasaý;
- paıdaly qazbalardyń qıyn alynatyn qorlaryn ıgerý úshin ozyq tehnologıalardy qoldaný, sıfrlandyrý, geoaqparattyq júıeler jáne iri tabysty kompanıalarmen tájirıbe almasý;
- geologıa salasyndaǵy baǵdarlamalar men strategıalardy qalyptastyrý;
- servıstik qyzmetter;
- bastapqy geologıalyq aqparattyń saqtalýyn qamtamasyz etetin Kern qoımasyn qalyptastyrý;
- halyqaralyq akredıtasıasy bar zerthanalar ashý;
- geologıalyq aqparatty jınaý, saqtaý, óńdeý, júıeleý jáne usyný úshin qorda saqtaý;
- ınvestısıalyq jobalardy ázirlep, ómirge engizý;
- memlekettik monıtorıń;
- «Kaznedra» biryńǵaı platformasynda barlyq bıznes-prosesterdi avtomattandyrý.