Jeltoqsan aıynda páterler quny birden 3-4 mıllon teńgege artqan
Sarapshylar bul sharyqtaý kelesi jyly da jalǵasatynyn aıtady, dep habarlaıdy Almaty-akshamy.kz informburo-ǵa silteme jasap.
Boljam boıynsha, naryqtaǵy dúrligý sáýirge deıin saqtalady. Sebebi qazaqstandyqtar zeınetaqy qoryndaǵy «jetkilikti shekten» asqan aqshasyn alýǵa asyq. Biraq ekonom sanatyna jatatyn páterlerge suranys kóp bolǵanymen, satyp alýshy az.
Krisha.kz sarapshylarynyń aıtýynsha, ásirese Nur-Sultan, Almaty, Shymkent, Qaraǵandyda baǵa kúrt ósken. Nur-Sultanda páterlerdiń sharshy metriniń baǵasy bir aıdyń ishinde 3,9%-ǵa kóterilgen. Almatyda baspana 3,2%-ǵa, Shymkentte 2,0%-ǵa qymbattasa, Qaraǵandyda 2,2%-ǵa sharyqtaǵan.
«Krisha-da baspanaǵa suranys sońǵy bir aptanyń ishinde 40 paıyzǵa ósti. Bul rekordtyq kórsetkish. Jalpy turǵyn úı baǵasynyń kóterilýine tek zeınetaqyǵa qatysty qarbalas ǵana emes, qurylys matrıaldardyń qymbattaýy da áser etip jatyr», – deıdi servıs sholýshysy Alına Býravseva.
Al qurylys kompanıalarynyń mamandary jańa jylda jańa úılerdiń baǵasy qymbattaıtynyn aıtady. Sáıkesinshe, eski úılerdiń de quny kóterilmek. Qazir elde eń qymbat páterler Almatyda. Sharshy metri ortasha eseppen 600 myń teńge. Al ekinshi orynda Nur-Sultan. Sharshy metriniń ortasha quny – 400 myń teńge.
Zeınetaqy jınaǵyndaǵy shekti mólsher kóteriledi degeli Qazaqstannyń barlyq óńirinde turǵyn úı baǵasy qymbattady. Máselen, Aqtóbede de rıeltorlardyń jumysy jandana túsken. Olar óńirde baspana baǵasynyń jalpy jyl basynan beri 15-20 paıyzǵa óskenin aıtady. Degenmen mamandar baǵanyń sharyqtaýyna tek bul ózgerister ǵana emes, kúnde qubylǵan dollardyń da quny qatty áser etti deıdi. Sarapshylar jyljymaıtyn múlik quny jańa jyldan bastap taǵy 15 paıyzǵa deıin qymbattaıdy dep boljap otyr.
«Jańa jyldan bastap eki esege qymbattaıdy. Ol jyl saıyn qaıtalanatyn jaǵdaı. Mysalǵa qazir 3-4 jyl burynǵy baǵa joq. Bir jyl burynǵy baǵa da joq. Qazir 2-3 esege, prımerno 20-30 paıyzǵa qymbattady», – deıdi rıeltor Aqmaral Ábiltaeva.