Sonymen qatar bul saladaǵy óndiris te tómendegen.
Qazaqstanda sút qymbattady, dep habarlaıdy Almaty-akshamy.kz
2022 jyldyń maýsym aıynda súttiń baǵasy 2,4%, jyl basynan beri 17,2% jáne bir jyl ishinde 21,5% óskenin habarlaıdy. Salystyrý úshin: 2021 jyly baǵanyń jyldyq ósimi nebári 9,5% bolǵan. 2022 jylǵy qańtar-mamyr aralyǵynda suıyq óńdelgen sút pen kilegeı óndirisi 235,3 myń tonnany qurady. Bul bir jyl burynǵydan 7% az. Bul alty jyldyq úzdiksiz ósimnen keıingi dál osy kezeńdegi alǵashqy quldyraý, – dep jazdy Energyprom.kz sarapshylary.
Sonymen qatar zertteýshiler sút pen kilegeı óndirisiniń jartysy Soltústik Qazaqstan (75,7 myń tonna) jáne Almaty (44,2 myń tonna) oblystaryna ǵana tıesili ekenin naqtylaıdy.
Óndiristiń iri kólemi myna óńirlerde tirkeldi:
Aqmola oblysy (34,2 myń tonna);
Qostanaı oblysy (28,5 myń tonna).
İshki naryqtaǵy satý kólemi 3,7%, 192 myń tonnaǵa deıin, al eksport eki esege jýyq qysqaryp, 5,6 myń tonnaǵa deıin tómendedi, – delingen zertteýde.
Sonymen qatar 2022 jyldyń birinshi toqsanynda shıki sútti tutyný ortasha eseppen jan basyna shaqqanda 3,5 lıtr boldy. Bul 2021 jyldyń sáıkes kezeńimen salystyrǵanda 5% az. Kilegeıdi tutyný, kerisinshe, bir jarym ese ósti.
Sútti tutyný aımaqqa baılanysty aıtarlyqtaı ózgeredi. Mysaly, qalalyq jerlerde 2022 jyldyń birinshi toqsanynda jan basyna shaqqandaǵy shıki sút tutyný ortasha eseppen 1,73 lıtr bolsa, aýyldyq jerlerde 6,04 lıtr boldy. Kilegeı tutyný boıynsha aıyrmashylyq onsha kóp emes: aýylda ortasha jan basyna 41 mıllılıtr, qalada 51 mıllılıtr.