«Qazaqstan Temirjoly» ulttyq kompanıasy 2027 jyldan bastap sýtegimen júretin lokomotıvter satyp almaqshy.
Osylaısha olar logıstıkalyq kompanıalardyń aldyndaǵy ekologıalyq ımmıdjin jaqsartpaq, dep habarlaıdy Almaty-akshamy.kz QazAqparatqa silteme jasap.
Aksıonerlik qoǵamnyń basqarma tóraǵasy Nurlan Saýranbaev «New Silk Way» halyqaralyq kólik-logıstıkalyq bıznes-forýmynda osyndaı málimet aıtty.
«Áýe men teńiz kóligine qaraǵanda qorshaǵan ortaǵa zıandy shyǵaryndylardy 8 ese az tastaıtynyna qaramastan, temirjol salasynda jetildirý qajet tustar jeterlik. 2027 jyldan bastap «Qazaqstan Temirjoly» jasyl sýtegimen júretin lokomotıvter satyp ala bastaıdy.
Iaǵnı, bizdiń lokomotıvter parki jasyl energetıkaǵa basymdyq beretin bolady. Oǵan deıin gazben júretin lokomotıvter satyp almaqshymyz. Ótkende ol týraly da kelisimderge qol qoıdyq. Gaz da jasyl tehnologıaǵa jatady. Iaǵnı, jasyl tehnologıa logıstıka salasyna kelip jatyr. İri kompanıalarmen kelissóz júrgizgende jobanyń qunymen birge júktiń ár tonnasyna qansha shyǵaryndy keletini naqty jazylady. İri kompanıalardyń bári logıstıkalyq ónim satqanda mindetti túrde kómirtegi izin kórsetip otyrady. Bul – ýaqyttyń pármeni», - dedi ol.
Kompanıa basshysy Qazaqstan aýmaǵymen júk tasymaldaǵysy keletin iri kompanıalar onlaın baqylaý júıesiniń jetilmegenine saqtyqpen qaraıtynyn aıtady.
«Bizdiń sala úshin sıfrlandyrý da mańyzdy. Óıtkeni iri kompanıalarmen sóıleskende olardyń aıtatyny bar. «Qazaqstan aýmaǵyna kirgen sátten bastap júgimizdi kórýden qalamyz. Qaı jerde ketip bara jatqany nemese turǵany beımálim bolyp ketedi», - degendi aıtady. Sondyqtan osyndaı tehnologıalardy beretin álemniń iri kompanıalarymen jumys istep jatyrmyz. Ázerbaıjan, Grýzıa, Ózbekstan tarapymen osy sıfrlyq dálizdi birizdi etip qurýǵa ýaǵdalasyp jatyrmyz», - deıdi Nurlan Saýranbaev.
Jalpy álemdegi tasymal tizbeginiń buzylýy «Qazaqstan Temirjoly» úshin qolaıly jaǵdaı týǵyzǵan uqsaıdy.
«Keıingi úsh jylda bizde tarıhı kórsetkishter tirkelip keledi. Iaǵnı, biz jyl saıyn Qazaqstan temirjolynyń eń joǵary kórsetkishterin jańartyp otyrmyz. Bıyl da solaı bolatyn túri bar. 9 aıdyń qorytyndysy boıynsha júk aınalymy 7 paıyz ósken. Negizgi ósim tranzıt esebinen bolyp tur. Tarnzıttiń óz ósimi – 25 paıyz. Bul óte jaqsy kórsetkish jáne Qazaqstan tranzıttik el retinde qalyptasqanyn aıǵaqtaıdy», - deıdi QTJ basshysy.
Aıta keteıik, Prezıdent Qasym-Jomart Toqaevtyń AQSH-qa sapary aıasynda «Qazaqstan temir joly» UK» aksıonerlik qoǵamy men Wabtec arasynda strategıalyq yntymaqtastyq týraly negizdemelik kelisimge qol qoıylǵan bolatyn. «Astana» halyqaralyq qarjy ortalyǵynyń basqarýshysy Renat Bekturovtyń aıtýynsha, amerıkalyq lokomotıv óndirýshi kompanıa Citibank-tiń qarjylandyrýy arqyly arqyly elimizde 240 jańa lokomotıv jasamaq. Mámileniń quny 900 mln dollarǵa teń.
Kelisim «Qazaqstan temir joly» kompanıasynyń 15 paıyzǵa jýyq lokomotıvin jańalaýǵa múmkindik beredi.