Almatyda úrmeli aspaptarda oryndaýshylarǵa arnalǵan halyqaralyq akademıa óz jumysyn qorytyndylady.
Bes kún boıy Fransıanyń, Qazaqstannyń, Japonıa men AQSH-tyń jetekshi oqýtyshylary osy aspaptardy meńgersem degen qazaq mýzykanttaryna sheberlik sabaǵyn ótkizdi, dep habarlaıdy Almaty-akshamy.kz 24.kz-ke silteme jasap.
Akademıanyń maqsaty ártisterdiń halyqaralyq sahnaǵa shyǵýyna jol ashý. Bul shara úsh jyldan beri Mádenıet jáne aqparat mınıstrligimen Jambyl atyndaǵy Qazaq memlekettik fılarmonıasynyń bastamasymen ótip keledi. Onyń joǵary deńgeıde uıymdastyrylýyna qoldaý kórsetkenderdiń qatarynda «Batyrhan Shúkenov» atyndaǵy qoǵamdyq qor da bar. Bıyl akademıaǵa qatysýǵa 100-ge jýyq mýzykant ótinish bergen. Sonyń tek jartysy irikteýden ótti. Talap boıynsha 14 jastan 45 jasqa deıingi kásibı oryndaýshylar men stýdentter qatysýǵa múmkindik aldy. Bilikti oqytýshylar dáris oqýmen qatar, gala konsertte óner kórsetti.
«Mádenı ortada bul mýzykalyq keshtiń mańyzy óte zor. Eýropada mundaı oqý óte qymbat turady. Biz talanttardy izdep tabý úshin, olarǵa qoldaý kórsetý úshin bárin tegin uıymdastyryp otyrmyz. Tipti irikteýden ótpegen qatysýshylarǵa sheberlik sabaǵyn tyńdaýǵa múmkindik berdik. Al akademıa qatysýshylary sertıfıkat alady. Pedagogtardyń qatarynda Júlen Lúka, Benýa Kýtrıs, Jasulan Abdyqalykov, Henrı Ýıllıford jáne Io Matsýshıta syndy myqty mamandar bar», - deıdi Jambyl atyndaǵy Qazaq memlekettik fılarmonıasynyń artısi Erjan Qoshanov.