Ol joba júzege assa, Qazaqstannyń aýyl sharýashylyǵynda on myńdaǵan jańa jumys orny ashylady.
QR Premer-Mınıstri Asqar Mamın Tyson Foods halyqaralyq bıznes jónindegi prezıdenti Krıstofer Langholspen kezdesý ótkizdi, dep habarlaıdy Almaty-akshamy.kz Rrimeminister.kz saıtyna silteme jasap.
Kezdesýde Qazaqstanda zamanaýı agro-mýltıproteın ındýstrıasyn damytý máseleleri talqylandy. QR Premer-Mınıstri Asqar Mamınniń AQSH-qa sapary barysynda 2019 jylǵy jeltoqsanda qol qoıylǵan kelisimge sáıkes, Tyson Foods qazaqstandyq Kusto Group kompanıasymen birlesip, Qazaqstanda sıyr eti óndirisiniń tolyq sıklyn ashýdy josparlap otyr.
Osylaısha, birinshi kezeńde QR-da ónimdiligi táýligine keminde 2 myń basty quraıtyn et óńdeıtin zamanaýı keshen salý kózdelgen. Kásiporyn qazaqstandyq naryqtyń qajettilikterin qamtamasyz etip qana qoımaı, sonymen qatar ónimdi shetel naryqtaryna da eksporttaıtyn bolady.
Jobany iske asyrý et ındýstrıasyn jáne AÓK-tiń basqa da irgeles salalaryn – veterınarıany, agrarlyq mashına jasaýdy, jemshóp daqyldaryn ósirýdi, bordaqylaý alańdaryn qurýdy jáne t.b. damytýdy yntalandyratyn bolady. Qazaqstannyń aýyl sharýashylyǵynda on myńdaǵan jańa jumys orny ashylady.
Óndiristik sıkl amerıkalyq «Ekstenshn» qyzmetiniń modeli boıynsha qazaqstandyq fermerlerge aqparattyq-keńestik qyzmet kórsetýmen súıemeldenetin bolady, bul keńes berýdi, jergilikti jerlerde kadrlardyń biliktiligin arttyrýdy jáne kásiptik-tehnıkalyq oqytýdy qamtıdy.
Tyson Foods kompanıasynyń negizi 1935 jyly qalanǵan, kompanıa aınalymy $43,1 mlrd quraıdy, qyzmetkerler sany – 139 myń adam.