Bul týraly Ádilet mınıstri Azamat Esqaraev aıtty.
Kelesi jyly jalpy 16 zań jobasyn ázirleý josparlanǵan, dep habarlaıdy Almaty-akshamy.kz
Jospar jobasyna sáıkes kelesi jyly sıfrlyq tehnologıalardy, áleýmettik salany, zıatkerlik menshik salasyn, ınovasıalyq qyzmetti, ǵarysh salasyn jáne basqa da salalardy damytý sıaqty ózekti baǵyttar boıynsha 16 zań jobasyn ázirleý kózdelgen.
"Josparlanǵan 16 zań jobasynyń ishinen 2 zań jobasy buryn rettelmegen qoǵamdyq qatynastardy reglamentteýge baǵyttalatyn bolady (Sıfrlyq kodeks jáne "Nysanaly kapıtal qorlary (endaýment-qorlar) týraly"). Memleket basshysy "Digital Bridge 2023" forýmynda sóılegen sózinde álemdik ozyq tájirıbege jaýap beretin, naryqtyń qajettilikterin de, azamattardyń múddelerin de eskeretin, zamanaýı quqyqtyq retteýshi bazany, onyń ishinde Sıfrlyq kodeks jobasyn da ázirleý jóninde aýqymdy mindet qoıdy. Ýaqyt talaptaryna sáıkes bilim jáne ǵylym salasyn damytý jáne ýnıversıtetterdi turaqty qarjylandyrýdy qamtamasyz etý maqsatynda nysanaly kapıtal qory týraly Zań jobasyn ázirleý usynylady", - dedi mınıstr.
Budan bólek birqatar zań jobasy 2030 jylǵa deıingi quqyqtyq saıasat tujyrymdamasynan týyndaıdy. Oǵan jer qoınaýyn paıdalaný máseleleri jónindegi zańnamany jetildirý kiredi.
"Qylmystyq jolmen alynǵan kiristerdi zańdastyrýǵa jáne terorızmdi qarjylandyrýǵa qarsy is-qımyl máseleleri boıynsha Zań jobasyn ázirleý Qarjylyq monıtorıńti damytýdyń 2022-2026 jyldarǵa arnalǵan tujyrymdamasynan týyndaıdy. Budan bólek Jospardyń jobasy respýblıkalyq búdjet jáne Ulttyq qordan kepildendirilgen transfert týraly jyl saıynǵy negizde ázirlenetin zań jobalaryn kózdeıdi", - dedi Azamat Esqaraev.
Vedomstvo basshysy "Quqyqtyq aktiler týraly" Zańǵa sáıkes Jospardyń jobasyn Memleket basshysymen kelisýge jiberý usynylatynyn da basa aıtty.