Jergilikti polısıa qyzmetiniń málimetinshe, Almatyda jyl basynan beri mopedterdiń qatysýymen 333 jol-kólik oqıǵasy tirkelip, sonyń saldarynan 14 adam qaza taýyp, taǵy 355 adam jaraqat alǵan, dep Almaty-akshamy.kz
«Mopedterdi paıdalanýmen baılanysty negizgi qaýipterdiń biri – olardyń jyldamdyǵy men qýatynyń joǵarylyǵy. Mopedtiń sılındriniń kólemi 50 tekshe santımetrden asatyn bolsa jáne maksımaldy jobalyq jyldamdyǵy saǵatyna 50 kılometrden assa, ol jolda aıtarlyqtaı qaýip tóndiredi. Bul mopedter jol qozǵalysyna qatysýshylardyń jaraqat alýyna, tipti adam ólimine ákeletin aýyr jol-kólik oqıǵalaryn týdyrýy múmkin. Qazirgi ýaqytta jastar arasynda balamaly kólik túrleri tanymal boldy. Almaty joldarynda olardyń 50 myńnan astamy júr, sáıkesinshe, bul faktor jalpy jol-kólik oqıǵalarynyń deńgeıine keri áserin tıgizýde», – deıdi Almaty qalalyq PD İSKB arnaıy tapsyrmalar jónindegi aǵa ınspektory Dáýren Myrzahanov.
Myrzahanovtyń aıtýynsha, joldaǵy qaıǵyly oqıǵalar toqtar emes. Ótken aptada Almatyda adam ólimine ákelgen apat boldy.
«Mopedterdiń jumysyna baılanysty másele bir kúnde sheshilmeıdi. Qalamyzdyń joldaryndaǵy qaýipsizdikti qamtamasyz etý úshin moped ıeleri men jalpy jurtshylyqtyń birtutas kúshi qajet. Bul joldaǵy alǵashqy qadam – árbir jol qozǵalysyna qatysýshynyń óz jaýapkershiligin sezinýi. Men azamattardy jol qozǵalysy erejelerin qatań saqtaýǵa shaqyramyn», – dedi Dáýren Myrzahanov.