Bul suraqqa Aýyl sharýashylyǵy mınıstri Erbol Qarashókeev jaýap berdi.
Bir aptada pıaz baǵasy 5,5%-ǵa qymbattady, dep habarlaıdy Almaty-akshamy.kz mınıstrlik málimdemesine silteme jasap.
Bıyl elimizde 1,1 mln tonna pıaz óndirilgen. Tutyný kólemi – 300 tonna.
«Byltyr 800 myń tonna pıaz ózimizge de, eksporttaýǵa da tolyq jetti. Bıyl álem boıynsha óte qıyn jaǵdaı týyndap tur. Negizgi pıaz óndirýshi elder túrli tabıǵı sebepterge baılanysty jyldaǵy kólemdi bere almady. Mysaly, Pákistanda qıyndyqtar bar. Bul el pıazdyń álemdik qoımasy sanalady. Alaıda onda sý tasqyny, qýańshylyq boldy... Qazir Qazaqstanda pıazdyń 100 myń tonnadan asa qory bar. Erte pisetin pıaz jetkizilgenshe, kóktemge deıin osy pıazdy saqtaýymyz kerek. Osyǵan baılanysty vedomstvoaralyq komısıa pıazdy syrtqa shyǵarýǵa shekteý qoıdy», - dedi Erbol Qarashókeev.
Onyń aıtýynsha, shekteý merzimi – 3 aı.
«Naryqtaǵy jaǵdaı ózgermese, 6 aıǵa deıin sozylýy múmkin. Biraq aı saıyn jaǵdaıdy baqylap otyramyz. Bizdiń óndirýshiler pıazdy syrtqa jaqsy baǵamen eksporttaǵan. Pıazdyń baǵasy – kóterme deńgeımen kelisine 150-170 teńge. Al Reseı, Ózbekstanda kóterme baǵanyń ózi 240 teńgeden asyp ketken. Sondyqtan pıaz baǵasyn turaqty saqtaý úshin ony syrtqa shyǵarýǵa shekteý qoıyldy. Qazir 3 aıǵa shekteý engizilgen. Naryqtaǵy jaǵdaı ózgerse, soǵan sáıkes áreket etemiz», - dedi mınıstr.
Saýda jáne ıntegrasıa mınıstrliginiń málimetinshe, elimizde bir aptada pıaz 5,5% qymbattaǵan.
«Ótken aptada kókónisterdiń baǵasy ósti. Pıaz baǵasy – 5,5%, sábiz – 1,3%, kartop 1% kóterildi», - dep jazylǵan habarlamada.