Senat depýtattaryn saılaý búlletenine 55 kandıdat tirkelgen.
Elimizde búgin saǵat 10.00-de QR Parlamenti Senatynyń depýtattaryn saılaý bastaldy, dep habarlaıdy Almaty-akshamy.kz QazAqparatqa silteme jasap.
Ortalyq saılaý komısıasynyń málimetine sáıkes, Senat depýtattaryn saılaý búlletenine 55 kandıdat tirkelgen. Onyń ishinde, Almatydan - 4, Jambyl, Pavlodar, Almaty, Jetisý, SQO jáne Túrkistan oblystarynan - 2 kandıdat bar. Basqa óńirlerden jáne Astana men Shymkentte 3 kandıdattan tirkelgen.
Respýblıka boıynsha Senat depýtattaryn saılaýǵa 3 168 daýys berýshi qatysady. Eń kóp daýys berýshi Túrkistan (317 daýys berýshi) jáne Qostanaı (263 daýys berýshi) oblystarynda. Al eń azy Astanada – 31, Shymkentte – 30 jáne Almatyda – 38.
Senat depýtattyǵyna kandıdattardyń tolyq tizimimen myna silteme boıynsha ótip, tanysýǵa bolady.
Elimizdiń Ortalyq saılaý komısıasynyń Qazaqstan Respýblıkasy Parlamenti Senaty depýtattarynyń kezekti saılaýyn ázirleý men ótkizý jónindegi negizgi is-sharalardyń kúntizbelik josparyna sáıkes, ótken jyly 24 jeltoqsanda jergilikti ýaqytpen saǵat 18:00-de kandıdattardy tirkeý aıaqtaldy.
Al 13 qańtar kúni saǵat 00:00-de kandıdattardyń saılaýaldy úgit-nasıhat jumystary toqtatyldy. Osylaısha, kúntizbelik josparǵa sáıkes, daýys berý kúnin uıymdastyrý men ótkizýge baılanysty saılaý aldyndaǵy barlyq is-sharalar aıaqtaldy.
Aıta keteıik, Senat depýtattaryn saılaý kúni, ıaǵnı búgin QR Ortalyq saılaý komısıasynyń ınternet-resýrsy arqyly saılaýshylardy tirkeýdi jáne daýys berýdiń aldyn ala qorytyndylaryn shyǵarýdy onlaın-baıqaý servısteri jumys isteıdi. Bul saılaý prosesiniń ashyqtyǵy men jarıalylyǵyna yqpal etedi.