2021 jyldan beri qaterli isikke shaldyqqan naýqastarǵa 12 848 ota jasalǵan.
Bul týraly Densaýlyq saqtaý mınıstrligi Medısınalyq kómekti uıymdastyrý departamentiniń dırektory Azamat Dúısenov aıtty, dep habarlaıdy Almaty-akshamy.kz QazAqparatqa silteme jasap.
«Hırýrgıalyq aralasý qaterli isikterdi emdeýdiń negizgi ádisteriniń biri sanalady jáne is júzinde barlyq onkologıalyq naýqastarǵa túrli kólemde jáne sáýlelik, hımıoterapıamen ártúrli kombınasıada jasalady. Tek hırýrgıalyq emdeý kóbine onkologıalyq aýrýdyń erte satysynda jasalady. 2021 jyly tek hırýrgıalyq em alǵan pasıentterdiń sany 5 306 adamdy qurady. Onyń ishinde alǵash osyndaı dert anyqtalǵan naýqastardyń úlesi – 15,1 paıyz.
2022 jyly 4 965 adamǵa ota jasaldy, onda alǵash anyqtalǵandardyń sany – 13 paıyz. Al 2023 jyldyń 6 aıyndaǵy kezeńde tek hırýrgıalyq em alǵan pasıentter sany 2 577 (alǵash anyqtalǵandardyń úlesi -12,9%) qurady», - dep jaýap bergen Azamat Dúısenov.
Onyń dereginshe, Qazaqstanda onkologıalyq dertter kóbine ekinshi satyda anyqtalady.
«Qazaqstanda kóbinese qaterli isikter qaterli prosestiń II satysynda dıagnoz qoıylady. Mundaılardyń úlesi 2021 jyly – 31,9%, 2022 jyly 30,3% qurady», - delingen jaýapta.