«Omıkronnyń» taralý jyldamdyǵy «delta» shtamynan 5 ese joǵary.
Qazaqstan Respýblıkasynda «omıkron» jańa shtamynyń taralýyna, sondaı-aq elde covid-19 koronavırýs ınfeksıasymen syrqattaný jaǵdaılarynyń kóbeıýine baılanysty koronavırýs ınfeksıasyna jol bermeý jónindegi vedomstvoaralyq komısıanyń tapsyrmasy boıynsha 2022 jylǵy 14 qańtardan bastap qosymsha aldyn alý sharalary engiziledi, dep habarlaıdy Almaty-akshamy.kz Sanıtarlyq-epıdemıologıalyq baqylaý komıtetine silteme jasap.
Osylaısha, Qazaqstan Respýblıkasynyń Bas sanıtar dárigeriniń qaýlysymen jumys jáne demalys kúnderi saýda ortalyqtary, saýda úıleri men saýda jelilerine qosa, sporttyq-saýyqtyrý jáne fıtnes-ortalyqtarǵa, ıoga-ortalyqtarǵa, baseınderge, saýnalarǵa, monshalarǵa kirý «jasyl» statýstyń (vaksınasıanyń bolýy, synamalar alynǵan sátten bastap 7 táýlikten aspaıtyn teris nátıjesi bar PTR-tesileýdiń bolýy, sońǵy 3 aı ishinde aýyryp jazylǵan, turaqty medısınalyq qarsy kórsetilimderi bar adamdar) bolýymen jumys rejımin shekteýsiz júrgiziledi.
Qabyldanǵan sharalar koronavırýstyń «omıkron» shtamynyń juǵý jyldamdyǵynyń joǵary deńgeıine negizdelgen. Ǵalymdar «omıkronnyń» joǵary juqpaly ekenin atap ótti- taralý jyldamdyǵy «delta» shtamynan 5 ese joǵary, ár úsh-tórt kún saıyn indetke shaldyqqandardyń sanyn eki ese arttyrady.
Qazaqstanda koronavırýs ınfeksıasy boıynsha epıdemıologıalyq jaǵdaıdyń nasharlaǵany baıqalady. Tek sońǵy táýlikte respýblıkada 9122 KVI+ jaǵdaıy tirkeldi. Engizilgen shekteýler eldegi epıdemıologıalyq jaǵdaıdy turaqtandyrýǵa, aýrýlar sanynyń ulǵaıý qaýpin azaıtýǵa, neǵurlym qatań shekteý sharalaryn engizýge jol bermeýge baǵyttalǵan.