Qazaqstandaǵy mobıldi ınternet jyldamdyǵy Reseı men Ortalyq Azıa elderine qaraǵanda áldeqaıda jyldam.
Speedtest Global Index derekterine sáıkes, 2022 jyldyń qyrkúıek aıynda Qazaqstandaǵy mobıldi ınternettiń ortasha jyldamdyǵy 22,6 Mb/s-qa deıin ulǵaıdy6 dep habarlaıdy Almaty-akshamy.kz Finprom.kz saıtyna silteme jasap.
Bul ótken jyldyń osy kezeńimen salystyrǵanda 14,5%-ǵa artyq.
Máselen, Reseıde bul kórsetkish 21,4 Mb/s-ty quraǵan. Al, Ortalyq Azıa elderi arasynda elimizden keıingi orynda Qyrǵyzstan (19,6 Mb/s) ornalassa, Ózbekstanda bul kórsetkish 15,8 Mb/s bolǵan. Odan keıin úlken aıyrmashylyqpen Tájikstan (7,9 Mb/s) eli ornalasady. Qyrkúıek aıynda Túrkimenstan boıynsha derekter usynylmaǵan.
Bul rette álemdegi mobıldi ınternettiń ortasha jyldamdyǵy 33,2 Mb/s bolǵan. Tizimde Norvegıa, BAÁ jáne Katar elderi kósh bastady.
Bıylǵy birinshi jáne ekinshi toqsannyń qorytyndysy boıynsha eń jyldam mobıldi ınternet boıynsha Ookla syılyǵyn elimizde Tele2 operatory aldy. Bıyl Tele2-degi mobıldi ınternettiń ortasha jyldamdyǵy 27,93 Mb/s-ty qurady.
2021 jyly Qazaqstanda 6 jastan 74 jasqa deıingi Internet paıdalanýshylardyń úlesi 92,9% boldy.
Elimizde mobıldi ınternet jyldamdyǵynyń ósýimen birge Internet trafıkti tutyný kólemi de artyp otyr. Bul Túrkıa, Sıngapýr, Italıa, Belgıa jáne t.b. elderge qaraǵanda áldeqaıda joǵary. Mundaı kórsetkishter telekom salasyndaǵy qomaqty ınvestısıalarǵa baılanysty. Mysaly, osy jyldyń qańtar-shilde aılarynda bul kórsetkish 62,6 mlrd tg, al 2021 jyly 128,6 mlrd tg quraǵan. Sektordaǵy ınvestısıalardyń úlken bóligi baılanys operatorlarynyń óz qarajaty esebinen qamtamasyz etilgen.