IýNESKO-nyń Búkilálemdik murasynyń tizimindegi muzdyqtardyń úshten biri 2050 jylǵa qaraı erıdi.
Bul týraly uıymnyń baıandamasynda aıtylǵan, dep habarlaıdy Almaty-akshamy.kz QazAqparatqa silteme jasap.
Onyń avtorlary klımattyń ózgerýine qarsy qandaı sharalar qoldanylsa da, Kılımandjaro janartaýyndaǵy, Dolomıtterdegi Alpi taý júıesindegi, Pıreneıdegi jáne AQSH-taǵy Iosemıt ulttyq saıabaǵyndaǵy muz massalaryn budan bylaı qutqarý múmkin emes dep sanaıdy.
Sonymen qatar, eger jahandyq jylyný kórsetkishi Selsıı boıynsha 1,5 gradýstan aspasa ǵana, muzdyqtardyń qalǵan úshten eki bóligin áli de saqtap qalýǵa bolady.
IýNESKO-nyń búkilálemdik murasynyń tizimine barlyǵy 18 600 muzdyq, ıaǵnı álemdegi árbir onynshy muzdyq kiredi. Olardyń jalpy aýdany 66 myń sharshy shaqyrymdy quraıdy.
IýNESKO mamandary bul muzdyqtar jyl saıyn shamamen 58 mıllıard tonna sý joǵaltatynyn eskertedi. Bul teńiz deńgeıiniń kóterilýine ákeledi, al muzdyqtardy tushshy sý kózi retinde paıdalanatyn jergilikti turǵyndar úshin bul jaǵdaı qıyndyqtar týdyrýy múmkin.
IýNESKO-nyń spýtnıktik derekterge negizdelgen baıandamasy Egıpette 6-18 qarasha aralyǵynda ótetin COP27 Klımattyq samıti qarsańynda jarıalandy.