Búgin Astanada «Green energy & waste recycling» VIII Eýrazıalyq bıznes-forýmynyń ekinshi kúni ótýde.
Forýmnyń baǵdarlamasy boıynsha Metan boıynsha Ekinshi ulttyq forým ótýde, onyń sheńberinde «Qaldyqtardy jınaý, suryptaý jáne qaıta óńdeý sektoryndaǵy ınovasıalyq tehnologıalyq sheshimder» tehnologıalyq sesıasy, «Qaldyqtardy basqarýdyń keshendi júıesi: jergilikti deńgeıde josparlaý jáne iske asyrý», «Ónerkásiptik qaldyqtardy ornyqty basqarý: normatıvter, ádistemeler jáne ESG tásilder» sesıalary jumys isteıtin bolady, Qaldyqtardy basqarý sektoryndaǵy SHOB: problemalar men sheshimder» atty pikirtalas sesıalary ótti, dep habarlaıdy aqshamnews.kz Ekologıa eáne tabıǵı resýrstar mınıstrligine silteme jasap.
Búgin is-sharada Ekologıa jáne tabıǵı resýrstar vıse-mınıstri M.Oshýrbaev sóz sóıledi. Óz sózinde memlekettik organdar úshin de, bıznes qoǵamdastyq úshin de metan shyǵaryndylaryn azaıtý salasyndaǵy óz is-áreketterin kórsetý úshin biregeı múmkindik ekenin atap ótti.
M. Oshýrbaev metan shyǵaryndylaryn azaıtý, ınvestısıalar tartý, granttar men basqa da qarjylandyrý kózderin izdeý boıynsha aýqymdy jobalardy iske asyrý úshin qarjylandyrý máselelerine tolyǵyraq toqtaldy. Metan shyǵaryndylaryn retteý, tıimdi normatıvtik-quqyqtyq bazany ázirleý jáne engizý, sondaı-aq derekterdi jınaý jáne óńdeý mańyzdy máselesine naqtylaı toqtaldy.
Metan shyǵaryndylary boıynsha derekterdi naqtylap jınaý jáne óńdeý olardy qysqartý jónindegi jobalardy tabysty iske asyrýdyń mańyzdy sharty bolyp tabylady.
Sóz sońynda vıse-mınıstr yntymaqtastyq jemisti bolatynyna jáne eleýli nátıjelerge ákeletinine senim bildirdi.
Sondaı - aq, atalǵan is-sharada Ekologıa mınıstrliginiń Klımattyq saıasat departamentiniń dırektory Sáýle Sabıeva sóz sóıledi.
S. Sabıeva metan shyǵaryndylarynyń kózderin túgendeý máseleleriniń jaı-kúıine sholý jasap, ony qysqartý jónindegi sharalar men saıasatty iske asyrýǵa baılanysty máselelerge toqtaldy.
Esterińizge sala keteıik, ótken jyly COP28-de Memleket basshysy Qazaqstannyń metan boıynsha Jahandyq mindettemege beıildiligi týraly málimdedi.