Osy naryqtyń damýyn tejeıtin birneshe negizgi faktor baıqalady. Máselen, kredıttik reıtıńtik agenttikterdiń qyzmetin retteýdiń bolmaýy, jergilikti reıtıńtik agenttikter qurý jáne olardyń jumys isteýi úshin zańnamalyq talaptardyń bolmaýy jáne qazaqstandyq kompanıalar úshin, ásirese, orta bıznes úshin reıtıńtik qyzmetter kórsetýdiń joǵary quny jáne shekteýli qoljetimdiligi syndy problemalar bar.
«Osyǵan oraı, Qarjy naryǵyn retteý jáne damytý agenttigi halyqaralyq tájirıbege súıene otyryp, kredıttik reıtıńtik agenttik qyzmetin retteıtin zań jobasyn ázirledi. Zań jobasynda birneshe jetekshi halyqaralyq uıymnyń usynystary eskerildi. Mysaly, IOSCO kompanıasy, ıaǵnı ol baǵaly qaǵazdar jóninde komısıalardyń halyqaralyq uıymynyń standarttary. Ol standarttarǵa sáıkes reıtıńtik agenttikter úshin kásiptik minez-qulyqtyń negizgi qaǵıdattaryn aıqyndaıdy jáne baǵaly qaǵazdar naryǵyn retteý maqsattaryn belgileıdi», – dedi spıker.
Sondaı-aq Bazel banktik qadaǵalaý komıtetiniń talaptary da qarastyryldy, ol Bazel II jáne Bazel III sheńberinde kredıttik táýekelderdi baǵalaý agenttikterine qoıylatyn biliktilik talaptaryn aıqyndaıdy. Oǵan qosa, Eýropalyq Odaqtyń dırektıvalary da
eskerildi.
«Kredıttik reıtıńtik agenttikter týraly» zań jobasynda negizgi halyqaralyq ınstıtýttar usynǵan kredıttik reıtıńtik agenttikterdiń qaǵıdalary qamtamasyz etilgen. Máselen, qujat obektıvtilik, táýelsizdik, ashyqtyq, aqparatty jarıa etý, resýrstardyń jetkiliktiligi, reıtıńtik agenttikterdiń turaqty qadaǵalaýy men eseptiligi sıaqty negizgi qaǵıdattaryn qamtamasyz etýge baǵyttalady.
Zań jobasy Qarjy sektoryn damytýdyń 2030 jylǵa deıingi tujyrymdamasyn iske asyrý aıasynda ázirlengen jáne kredıttik táýekelderdi táýelsiz reıtıńtik baǵalaý ınstıtýtyn damytýǵa jaǵdaı jasaýǵa baǵyttalǵan, bul qor naryǵynyń quraldary arqyly bıznesti qarjylandyrý tetikterin keńeıtýge yqpal etedi.