Almatyda 85 vaksına pýnkti jumys isteıdi
Ótken táýlikte koronavırýstan 343 adam emdelip shyqty, dep habarlaıdy Almaty-akshamy.kz Almaty.tv-ge silteme jasap. Al, jalpy indet bastalǵaly dertine daýa tapqandardyń sany 1 mln 293 899 adamǵa jetken. Osy tusta ekpeniń 2-komponentin alý úshin Almatynyń ózinde 8 vaksına pýnkti jumys istep tur.
Sońǵy resmı derekke súıensek, el boıynsha ekpe alǵandardyń sany 1-komponent úshin 1 mln 228 myń, al 2-komponent deńgeıinde 1 mln 161 myń adamnan asyp otyr. Bul qatarda jasóspirimder men júkti jáne bala emizetin áıelder de bar. Qalalyq №3 emhana turǵyndar úshin vaksına salatyn kezekti mekemelerdiń biri. Mamandar indet qaıta órshigeli munda keletin azamattardyń da qatary kóbeıgenin aıtady.
«Revaksınalaýǵa keldim búgin. Profılaktıkalyq tekserýden ótem. Qazir Almaty qalasynda Kovıd-19 qaıtadan ýshyǵyp jatyr. Qaıtadan qyzyl zonaǵa kirýi múmkin. Ózimniń densaýlyǵymdy oılaǵan jón dep sanaımyn», – dedi qala turǵyny Ravıl Joldymbaı.
«Epıdemıa degen óte qorqynyshty ǵoı. Ózimdi bylaı qoıǵanda, jaqyndarymnyń aman bolǵanyn tileımin. Buryn da ekpe alǵanmyn, búgin qaıta ekpe alý úshin keldim», – dedi qala turǵyny Olga Kozlova.
Dárigerler ekpe arasynda uzaq ýaqyt ótip ketse, adam aǵzasyndaǵy antıdenelerdiń azaıatynyn aıtady. Sondyqtan, tıisinshe ýaqytyly vaksına salǵyzǵan jón.
«Búgingi kúnge deıin bizdiń №3 emhana 1-komponentpen 41232 adam, 2-komponentpen 39 378 adam ekpe aldy. 29 039 adamǵa qaıta egildi. Onyń ishinde júkti áıelder, bala emizetin áıelder, jasóspirimder qamtylǵan», – dedi qalalyq №3 emhananyń bólim meńgerýshisi Aqbaıan Dáýletbaeva.
Qazir Almatydaǵy medısınalyq uıymdarda 85 vaksına pýnkti jumys isteıdi. Al, jalpy 99 brıgadaǵa 313 qyzmetker jumyldyrylyp otyr.