Qaıǵyly jaǵdaılar adamdarǵa sonda da sabaq bolmaı tur.
Abaısyzda sýǵa ketetinderdiń 100-ge jýyǵy - órimdeı balalar, dep habarlaıdy Almaty-akshamy.kz.
Ókinishke qaraı, bul qabyldanyp jatqan sharalardyń jetkiliksiz ekenin kórsetedi. Bul týraly Úkimet otyrysynda aıtyldy. Bıyl, jyl basynan beri 45 adamnyń ajaly sýdan bolǵan. Olardyń 14-i - kámeletke tolmaǵandar. Tótenshe jaǵdaılar mınıstri Iýrıı Ilınniń aıtýynsha, qaıǵyly jaǵdaılardyń kóbi arnaıy jabdyqtalmaǵan jaǵajaılarda bolady. Ári balalardy qaraýsyz qaldyrý, mas kúıinde shomylý da oqys oqıǵaǵa sebep bolyp otyr. Vedomstvo málimetinshe, maýsymnyń bes kúniniń ózinde 17 adam sýǵa batyp ketken.
«Bul - shynymen de alańdatarlyq jaǵdaı. Qazir shomylý maýsymyna daıyndyq jumystary jalǵasyp jatyr. Óńirlerde shomylýǵa qajetti arnaıy oryndar jabdyqtalyp, jańa jaǵajaılar salynyp jatyr. Sondaı-aq qaýipsizdikti qamtamasyz etý úshin profılaktıkalyq jumystar júrip jatyr. Soǵan qaramastan, sýdaǵy qaıǵyly jaǵdaılar azaımaı otyr. Ókinishke qaraı, elimizde jyl saıyn 300-ge jýyq adam sýǵa ketip, qaıtys bolady. Onyń 100-ge jýyǵy - balalar. Bul qabyldanyp jatqan sharalardyń jetkiliksiz ekenin kórsetedi», - deıdi QR Premer-Mınıstri Álıhan Smaıylov.