16 adam alkogóldik ishimdikter ishken nemese qoǵamdyq oryndarda masań kúıinde bolǵan.
Elimizde jyl basynan beri túrli ákimshilik quqyq buzýshylyq jasaǵan 39 adam áýe reısterinen túsirildi, dep habarlaıdy Almaty-akshamy.kz Polisia.kz-ke silteme jasap.
Elimizdiń kólik polıseıleri osy jyldyń basynan beri túrli ákimshilik quqyq buzýshylyq jasaǵan 39 azamatty áýe reısterinen túsirdi, onyń 16-sy alkogóldik ishimdikter ishkeni nemese qoǵamdyq oryndarda masań kúıinde bolǵany úshin, 5-eýi áýe kemesinde minez-qulyq qaǵıdalaryn buzǵany úshin jáne taǵy da basqa teris qylyqtary úshin túsirilgen.
Bul týraly kóliktegi polısıa departamenti ákimshilik polısıa basqarmasynyń bastyǵy Dáýlet Moldahanov habarlady. Onyń aıtýynsha, Astana qalasy áýejaıyndaǵy jelilik polısıa bólimine FlyArystan áýekompanıasynyń ókilderinen «Túrkistan – Astana» baǵytyndaǵy reıstiń jolaýshysyna qatysty shara qabyldaý týraly habarlama tústi. Áýe kemesi Astanaǵa ushyp kelisimen jolaýshy áıel akt boıynsha polıseılerge berildi.
«Tekserý barysynda kólik saqshylary masań kúıinde bolǵan jáne ushaq bortyndaǵy qaýipsizdik erejelerine baǵynbaǵan Túrkistan qalasynyń 37 jastaǵy turǵynyn anyqtady. Quqyq buzýshyǵa qatysty QR ÁQBtK-niń 440-baby 1-bóligi jáne QR ÁQBtK-niń 566-baby 1-bóligi boıynsha eki ákimshilik hattama toltyrylyp, 8 aılyq eseptik kórsetkish (27 600 tg) mólsherinde aıyppul salyndy», - dedi D.Moldahanov.
Esterińizge sala keteıik, azamattardyń áýe kemesiniń bortynda minez-qulyq erejelerin buzýy qalǵan jolaýshylarǵa qolaısyzdyq keltirip qana qoımaı, ushý qaýipsizdigine qater tóndirýi múmkin.