Mundaı tájirıbe Fınlándıada bar.
İİM joldaǵy qaýipsizdik sharalaryn talqylady, dep habarlaıdy Almaty-akshamy.kz Polisia.kz-ke silteme jasap.
İİM-de qoǵamdyq qaýipsizdikti qoǵammen seriktestikte qamtamasyz etý tujyrymdamasynda qaralǵan jol-kólik oqıǵalary saldarynyń zardabyn tómendetý strategıasynyń tetikteri qaraldy.
Pikirtaslasqa qatysýshylar - memlekettik organdar, «Qazavtojol» AQ, «Atameken» UKP jáne Qazaq jol qozǵalysy qaýipsizdigi ǴZI ókilderi joldarda «nóldik ólim-jitim» qaǵıdatyn iske asyrý jáne jol-kólik oqǵalarynyń negizgi sebepterine yqpalyn tıgizetin sheshimderdi talqylady.
Jol-kólik oqıǵasynda jaraqat máselesi san qyrly jáne jol qozǵalysyna qatysýshylardyń tártibine baılanysty ekeni atap ótildi. Sondyqtan azamattyq sektor álemniń 60 elin qamtıtyn ESRA (E-Survey of road Users’ Attitudes) halyqaralyq áleýmettik suraqtar baǵdarlamasy negizinde qaýipsiz qozǵalys zertteýlerin júrgizýge bastamashylyq jasaıdy, bul joldardaǵy qaýipsizdikti qamtamasyz etý saıasatyn túzetýge múmkindik beredi.
Mysaly, Jezqazǵan qalasyndaǵy pılottyq joba sheńberinde júrgizilgen saýalnama óńirde jyldamdyqty asyrý shegi álemdik deńgeıden 2,6 ese joǵary, bekitilmegen beldikpen júrgizý qaýpi 8,5%-ǵa joǵary ekendigi anyqtaldy.
Sondaı-aq uıaly telefondardy paıdalaný jáne jaıaý júrginshilerdiń qaýipti áreketteriniń deńgeıi de joǵary.
Kezdesýde qala syrtyndaǵy jáne túzý jol ýchaskelerinde «ortasha jyldamdyq» uǵymyn engizý boıynsha bastamalar qoldaý tapty. Sol úshin tujyrymdamada sıfrlyq sheshimderdi damytý – jol qozǵalysy erejelerin buzýshylyqtardy tirkeý júıelerin jáne osyndaı buzýshylyqtardy anyqtaıtyn arnaıy aparattyq-baǵdarlamalyq keshenderdi keńinen engizý qarastyrylǵan. Sondaı-aq halyqaralyq tájirıbe negizinde avtojoldardy jobalaý men rekonstrýksıalaý tásilderin ózgertý josparlanǵan. Osy maqsatqa saı analıtıkany engizý jáne «Vision Zero» sıaqty arnaıy baǵdarlamalyq jasaqtamany qoldaný kózdelip otyr.
Sonymen qatar «QazAvtoJol» AQ ókilderi álemniń 18 elinde júzege asyrylyp jatqan mektepter mańyndaǵy jol qaýipsizdigi halyqaralyq baǵdarlamasynyń «Star Rating for Schools» jobasyn synaqtan ótkizýdi usyndy. Bul joba mektepter janyndaǵy jol qozǵalysy qaýipsizdiginiń keshendi júıesin pedagogtar men oqýshylardyń ózderin belsendi tarta otyryp qurýdy kózdeıdi.
Tujyrymdamaǵa TJM-men birlesip qala syrtyndaǵy trassalarda jol-kólik oqıǵasynan zardap shekkenderge shuǵyl kómek kórsetý jónindegi sharalar engizilgen.
Keńeske qatysýshylar Fınlándıanyń tájirıbesin de qarastyrdy. Bul eldiń tájirıbesinde júrgizýshi kýáligi 2 jyldyq synaq merziminen jáne birqatar emtıhandardan ótkennen keıin beriledi. Qazir elimizde osyndaı tájirıbeni engizý durystyǵy men múmkindigi qarastyrylyp jatyr.
Jol-kólik oqıǵalaryndaǵy ólim-jitimdi azaıtý jónindegi osy jáne basqa da sharalar Qoǵamdyq qaýipsizdikti qoǵammen seriktestikte qamtamasyz etýdiń 2024-2028 jyldarǵa arnalǵan tujyrymdamasyna negizdeletin bolady.