Qus ósirýshiler Aýyl sharýashylyǵy mınıstrligi óziniń ýádesin oryndamaǵanyn aıtady.
Elimizde jumyrtqa qymbattaýy múmkin. Jarty jyl boıy sala shyǵynǵa batyp jumys istegen. Mamandar memlekettiń qoldaýyn kútemiz dep jumyrtqanyń baǵasyn ustap turǵanyn aıtady, dep habarlaıdy Almaty-akshamy.kz Azattyq Ruhy-na silteme jasap.
Elimizdegi qus sharýashylyǵynda eńbek etetinderdiń 70 paıyzy aýyl, aýdandaǵy áıelder bolyp otyr. Qus fabrıkalarynda 12 myń qyzmetker jumys isteıdi.
Bir jylda el turǵyndary 5 mlrd dana jumyrtqa tutynady. İshki naryqty tek otandyq fermerler qamtamasyz etip otyr.
Qaraǵandydaǵy qus fabrıkasynyń óndiris basshysy Dos Mahanov fabrıka táýligine 310 myń dana jumyrtqa shyǵaratynyn aıtady.
«Biraq jaǵdaı osylaı jalǵasa beretin bolsa, biz óndiristi qysqartýǵa májbúr bolamyz. Aılyqtyń azdyǵynan qyzmetkerler basqa salaǵa aýysyp jatyr. Qus fabrıkasy Astana, Qaraǵandy jáne Túrkistan oblystaryn jumyrtqamen qamtamasyz etip otyr. Bul salany qamtıtyn qondyrǵylarǵa da qyrýar qarjy kerek», - deıdi ol.
Qus ósirýshiler sońǵy jyldary salada daǵdarys bolyp jatqanyn aıtady.
«Jyl saıyn bólinetin sýbsıdıa kólemi qysqara berdi. Bıyl múldem toqtap qaldy. Qazir 24 paıyzdyq nesıemen qaldyq. Sýbsıdıany alyp tastaý qus ósirý salasyna túbegeıli áser etip otyr. 12 myń qyzmetker jumyssyz qalsa, qaıda barady?», - deıdi olar.
Qus ósirý salasynyń qyzmetkerleri ASHM basshysy Erbol Qarashókeevtiń 2022 jyly 12 jeltoqsanda Májilistegi dóńgelek ústelde aıtqan ýádesine sengen.
«Qańtarda bul máseleni sheshemiz. Qarajat bar. Ortalyqtandyrylǵan transfert arqyly beriletin sýbsıdıa kólemi belgilengen», - degen edi ol.
Sonymen qatar, qus ósirýshiler Aýyl sharýashylyǵy mınıstrligine birneshe ret hat joldaǵan. Biraq, sýbsıdıanyń aýyly áli de alys.