QR Týrızm jáne sport mınıstrligi joǵary jetistikter sporty túrleriniń tizimin bekitti.
Oǵan Olımpıada, Paralımpıada, Sýrdlımpıada, Azıa jáne Azıa para oıyndarynyń baǵdarlamasyna engen 65 sport túri, sondaı-aq ulttyq sport túrleri engizildi, - dep habarlaıdy Aqshamnews.kz.
Mınıstrliktiń baspasóz qyzmetiniń habarlaýynsha, atalǵan sport túrlerin qarjylandyrý respýblıkalyq jáne jergilikti búdjet esebinen basym tártippen júrgiziledi. Qarajat sport rezervin daıarlaýǵa, sportshylardyń halyqaralyq jarystarǵa qatysýyna, oqý-jattyǵý jıyndary men sporttyq is-sharalar ótkizýge, sport ınfraqurylymyn kútip-ustaýǵa jáne damytýǵa baǵyttalady.
65 joǵary jetistikter sporty túriniń ishinen 46-sy basymdyqqa ıe dep belgilendi. Olardyń qatarynda 11 ulttyq sport túri bar. İrikteý jumystary Qazaqstan ulttyq quramalarynyń Olımpıada, Paralımpıada, Sýrdlımpıada, Azıa jáne Azıa para oıyndarynda kórsetken nátıjelerine qarap jasaldy. Joǵary jetistikter sporty túrleriniń tizimine enbegen sport túrleri buqaralyq sport qaǵıdaty boıynsha damytylady. Jergilikti atqarýshy organdar sportshylardyń el chempıonattary men keshendi jarystarǵa qatysýyn qarjylandyrady. Al halyqaralyq jarystarǵa búdjet esebinen qatysa almaıdy. Tek demeýshilerdiń nemese ózge de qarajat esebinen qatysýyna bolady. Tizim jyl saıyn jańartylyp otyrady. Bul Olımpıada, Paralımpıada, Sýrdlımpıada, Azıa jáne Azıa para oıyndarynda joǵary nátıje kórsetken sport túrlerin qosýǵa múmkindik beredi.
Zań jobasyna engizilgen túzetýler qoǵam ókilderi, depýtattar, sport salasynyń mamandary, federasıalar, bapkerler, sarapshylar qaýymdastyǵy men úkimettik emes uıymdardyń pikirin eskere otyryp daıyndalǵanyn erekshe atap ótken jón.
Eske sala ketsek, Memleket basshysynyń tapsyrmasyna sáıkes elde sport salasyna keshendi reforma júrgizilip jatyr. Mınıstrlik dene shynyqtyrý jáne sport salasyn júıeli reformalaýǵa baǵyttalǵan «Dene shynyqtyrý jáne sport týraly» zań jobasyn ázirledi. Zań jobasyndaǵy birqatar mańyzdy ózgerister:
- sporttyń oıyn túrleri boıynsha kásibı klýbtardy kútip-ustaýǵa bólinetin búdjet qarajatyna lımıt engizý;
- Qazaqstan Respýblıkasynyń azamaty emes sportshylardy búdjet esebinen qarjylandyrýǵa tyıym salý;
- «basym sport túrleri» uǵymyn naqtylaý jáne olardyń óńirlik tizimin bekitý;
- akkredıttelgen sport federasıalaryna dinı ekstremızm men terorızmniń aldyn alý sharalaryn qabyldaý mindetin júkteý;
- sport federasıalaryn akredıtteý talaptaryn kúsheıtý;
- «múgedektigi bar sportshyny súıemeldeýshi» uǵymyn engizý;
- dene shynyqtyrý jáne sport salasyndaǵy memlekettik uıymdar basshylaryn rotasıalaý tetigin engizý;
- «sporttyq daıyndyqtyń ulttyq standarttary» uǵymyn bekitý.
-Mınıstrlik elimizde sporttyń turaqty damýyna jaǵdaı jasap keledi. Ulttyq sport túrlerine olımpıadalyq sport túrlerimen teń mártebe berilip, vertıkaldy basqarý júıesi qalyptastyrylady. Sondaı-aq búdjet qarajaty áldeqaıda tıimdi jumsalmaq,-delingen habarlamada.