Bul týraly Energetıka mınıstri Bolat Aqsholaqov Ortalyq komýnıkasıalar qyzmeti alańynda ótken brıfıńte aıtty, dep habarlaıdy Almaty-akshamy.kz.
Mınıstr elimizde janar-jaǵarmaıdyń jaǵdaıyn retteý úshin túrli sharalar qabyldanǵanyn eske saldy.
«Janarmaıdy temir jol jáne kólikpen shyǵarýǵa tyıym salyndy. Sondaı-aq resýrs ıelerine janarmaıdy tikeleı janarmaı stansıalaryna satýǵa mindetteıtin zańnamalyq normalar qabyldandy», - dedi Aqsholaqov.
Sózinshe, sonymen birge munaıdy jetkizý jáne munaı ónimderin satý kezindegi ónimsiz deldaldar alynyp tastaldy.
«Budan basqa, byltyrdyń tamyz aıynda biz tapshylyqty azaıtý úshin saralanǵan baǵa (450 teńge) jáne lımıtter (300 lıtrge deıin) engizdik. Biraq barlyq shekteýge qaramastan, «kóleńkeli eksport» arqyly otyndy shyǵarý múmkindikteri tabyldy», - dep túsindirdi ol.
Mınıstrdiń aıtýyna qaraǵanda, tapshylyqty boldyrmaý úshin elimiz shuǵyl túrde qymbat ımporttyq otyndy satyp alýǵa májbúr bolyp otyr.