Qazaqstanda 2 aqpan - Ulttyq basylym kúni merekesi bolyp bekitilýi múmkin.
Bul usynys Ashyq NQA portalynda jarıalanǵan Úkimet qaýlysynda jazylǵan, dep habarlaıdy Almaty-akshamy.kz QazAqparatqa silteme jasap.
«QR Prezıdenti Ákimshiligi Basshysynyń orynbasary Aıda Balaevanyń 2023 jylǵy 13 aqpandaǵy tapsyrmasyna sáıkes, 2 aqpandy Ulttyq basylym kúni dep atap ótý usynylady. Osyǵan baılanysty Qazaqstandaǵy merekelik kúnder tizbesiniń qurylymyna jańa merekelik kún, 2 aqpan – Ulttyq basylym kúni engiziledi», - delingen qaýly jobasynda.
Qujatqa qosymsha berilgen túsindirmede bul bastama buqaralyq aqparat quraldarynyń mańyzyn aıqyndap, sala qyzmetkerlerin yntalandyrý maqsatynda usynylǵany jazylǵan.
«28 maýsym - buqaralyq aqparat quraldary qyzmetkerleri kúni, 2021 jyldan bastap 1 qazan - Radıo qyzmetkerleri kúni dep belgilendi. Bul dástúr BAQ-tyń mańyzyn kórsete otyryp, osy saladaǵy qyzmetkerlerdi yntalandyra túsedi. Ulttyq basylymnyń alǵash shyqqan kúnin ulyqtaý Reseı, Ázirbaıjan, Tájikstan, Qyrǵyzstan sıaqty elderde dástúrge aınaldy. Buqaralyq aqparat quraldarynyń bastaýynda turǵan «Qazaq» gazetiniń alǵashqy sany shyqqan kúnin tarıhı mańyzdy dataǵa aınaldyrýdyń mańyzy zor», - dep túsindirme berilgen qaýlyǵa.
Qaýly jobasy 3 sáýirge deıin kópshilik talqylaýda bolady.