Barlyǵy otbasynan bastalady.
Qazaqstan Úkimeti múgedektigi bar azamattardyń quqyǵyn qorǵaý maqsatynda arnaıy áleýmettik jobany iske asyra bastady, dep habarlaıdy Almaty-akshamy.kz.
«Qazaqstannyń Aqparat jáne qoǵamdyq damý mınıstrliginiń qoldaýymen iske asyrylatyn áleýmettik jobanyń maqsaty – ınklúzıvti qoǵamdy damytý, múmkindigi shekteýli jandarǵa tolerantty qarym-qatynasty qalyptastyrý», - delingen atalmysh mekemeniń baspasóz qyzmetiniń habarlamasynda.
Joba qoǵamda álsiz toptardaǵy azamattardy kemsitý deńgeıin tómendetý, múgedektigi bar qazaqstandyqtardyń teńdigi, múmkindikteri boıynsha dıalogty uıymdastyrýǵa baǵyttalǵan.
«Qazirdiń ózinde biz múgedektigi bar eresek adamdardyń bala kezinde kemsitýshilik faktilerin bastan keshirgenin jıi baıqaımyz. Olar qoǵamnan oqshaýlanady, olardyń áleýmettik baılanystary buzylady. Áleýmettik oqshaýlaý prosesi júredi. Iá, olar memlekettik járdemaqy alǵanymen, úıde otyrady, olardyń dostary óte az», - dedi «Qorǵan-M» QB tóraıymy Dıana Qyrǵyzbaeva jobany tanystyrý barysynda.
Spıkerdiń aıtýynsha, bıyl olar ınklúzıvti qoǵam qurý máseleleri boıynsha jumys isteıtin mamandarǵa arnaıy semınar-trenıngter ótkizedi.
«Barlyǵy otbasynan bastalady. Sondyqtan ınklúzıvtik tárbıege erte jastan erekshe nazar aýdarý kerek. Atap aıtqanda, bizdiń qyzmetkerlerimiz balabaqshalar men jalpy bilim beretin mektepterdiń tómengi synyp oqýshylaryna ınklúzıvti bilim berýmen aınalysady. Mundaı balalar ósken kezde múgedek adamdardy kemsitýge jol bermeıtinine senimdimin», - dedi Dıana Qyrǵyzbaeva.
Bıyl uıymdastyrýshylar ózekti máselelerdi talqylaý maqsatynda dıalog alańyn ótkizýdi josparlap otyr.
Sonymen qatar, joba aıasynda jas qazaqstandyqtar úshin semınarlar ótkizilip, onda «teń-teńimen» qaǵıdaty boıynsha ınklúzıvti qoǵam qurý týraly aıtylady.