Esirtki nasıhattaýshylary jazaǵa tartylady.
QR İİM esirtki qylmysyna qarsy is-qımyl departamenti basqarma bastyǵy Baqytjan Ámirhanov elimizde esirtkini túrli ádistermen nasıhattaıtyndardyń jaýapqa tartylatynyn aıtty. Olardyń ishinde reperler, grafıtı sýretshileri, túrli saıttar kiretini atap ótildi, dep habarlaıdy Almaty-akshamy.kz Elorda.info-ǵasilteme jasap.
Basqarma bastyǵy elimizde jasóspirimder men jastardyń, ásirese, reperler men ánshilerge elikteýshilikteriniń basym ekenin jetkizdi.
«Jastar búginde rep aıtatyn túrli toptarǵa elikteıdi. Mysaly, biz osyǵan deıin Mad Men tobyn osy esirtki qylmysy boıynsha ustaǵan bolatynbyz. Olar óz kezeginde jastar arasynda óte tanymal top. Biz mundaı oqıǵalardan soń bárine muqıat nazar aýdaratyn boldyq. Máselen, qazir rep aıtyp júrgenderdiń ánderiniń mátinderinde marıhýana taǵy da basqa esirtkiler týraly sózder qosylyp júr. Bunyń ózi esirtkini nasıhattaý bolyp sanalady. Buryn bundaı áreketterge tek ákimshilik jaza qoldanylsa, búgingi tańda Qylmystyq kodekstiń 299-1 baby boıynsha 3 jyldan 6 jylǵa deıin bas bostandyǵynan aıyrý jazasy kózdelgen», – dedi Ámirhanov.
Basqarma bastyǵynyń málimetinshe, osy bap boıynsha búgingi tańda 79 is tirkelgen. Ol bul isterge jaza qoldanbas buryn naqty dálelder men arnaıy saraptama júrgiziletinin qosa ketti.
«Ol úshin de arnaıy saraptamalar júrgiziledi. Marıhýana esirtki dep aıtylsa, ony naqty jaýapqa tarta almaımyz ǵoı. Biz jelilerden ózimizdiń arnaıy mamandarymyz arqyly baqylaý jumystaryn júrgize otyryp, muqıat qaraımyz. Mátininde esirtki týraly bir sóz bar eken dep bárin jaýapqa tarta almaımyz. Aıtyp ketkenimdeı, ony nasıhattaýshylardy tergep, án bolsa ánin, belgili bir kıim men sýretter bolsa, ony sot saraptamasynan ótkizip baryp jaýapqa alamyz. Bul jerde Ákimshilik te, Qylmystyq ta kodeks qarastyrylady.
Almatyda jaqynda rep jazǵan osyndaı bir top mátinin saraptamadan ótkizip, 296-bap boıynsha tirkedik. Qazir tergeý, tekserý amaldary júrip jatyr. Biz mundaı mátinderge birden kóńil bólemiz», – dep qosty Ámirhanov.