Qazaqstanda erli-zaıypty zeınetaqy anýıtetin engizý josparlanyp otyr. Ol erli-zaıyptylardyń nemese jaqyn týystardyń zeınetaqy jınaqtaryn biriktirýge jáne olardyń árqaısysyna jeke keste boıynsha ómir boıy tólemder belgileýge múmkindik beredi.
12 shildede Memleket basshysy «Qazaqstan Respýblıkasynyń keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý boıynsha ózgerister men tolyqtyrýlar engizý týraly» QR Zańyna qol qoıǵan edi.
Zańdaǵy jańalyqtardyń biri – birlesken (erli-zaıypty) zeınetaqy anýıtetin engizý, dep habarlaıdy Almaty-akshamy.kz QazAqparatqa silteme jasap.
«Mysaly erli-zaıyptylardyń, 55 jastaǵy kúıeýi men áıeliniń 11,6 mln teńge jáne 5 mln teńge mólsherinde zeınetaqy jınaǵy bar. Bul rette kúıeýi úshin eń tómengi kúnkóris deńgeıiniń 70% mólsherindegi aı saıynǵy tólemmen zeınetaqy anýıtetiniń eń tómen quny 7,4 mln teńgeni, áıeli úshin – 9,2 mln teńgeni quraıdy. Tıisinshe, áıeldiń jınaq somasy jeke zeınetaqy anýıteti shartyn jasasý úshin jetkiliksiz. Jınaqty biriktirip jáne birlesken zeınetaqy anýıteti shartyn jasaı otyryp, erli-zaıyptylardyń árqaısysy ómir boıyna tólem ala alady», - dedi QR Qarjy naryǵyn retteý jáne damytý agenttigi tóraǵasynyń orynbasary Marıa Hadjıeva ortalyq komýnıkasıalar qyzmetinde ótken baspasóz máslıhatynda.
Onyń aıtýynsha, birlesken zeınetaqy anýıtetterin engizý azamattardyń jınaq bastamalaryn arttyrýǵa jáne zeınetkerlikke shyqqan kezde olarǵa qosymsha jınaqtardy qamtamasyz etýge múmkindik beredi.
«Damyǵan elderde zeınetaqy anýıteti sharttary zeınetaqy júıesiniń ajyramas bóligi bolyp tabylady. Skandınavıa elderinde (Danıa, Shvesıa, rvegıa) birlesken anýıtetter erikti ónimder bolyp tabylady, al Latyn Amerıkasy elderinde (Chılı, Meksıka, Argentına) birlesken anýıtetter mindetti sıpatqa ıe», - dedi M. Hadjıeva.