Qazaqstanda er adamdardyń uqsas pozısıalardaǵy áıelderge qaraǵanda alatyn jalaqylary 27%-ǵa joǵary
Eń úlken alshaqtyq — 70% - dan asady, mundaı aıyrmashylyq Atyraý jáne Mańǵystaý oblystarynda baıqalady, dep habarlaıdy Almaty-akshamy.kz.
Finprom.kz derekterine saı, 2023 jyly el boıynsha qyzmetkerlerdiń ortasha aılyq ataýly jalaqysy 322,8 myń teńgeni qurady — bir jyl burynǵyǵa qaraǵanda aqshamen 20% - ǵa artyq.
Onyń ishinde er adamdardyń jalaqysy 361,5 myń teńgege ( 22,3% artqan), áıelderdiń jalaqysy — 285,7 myń teńgege (+16,4%) jetti. Erlerdiń jalaqysy jalpy ortasha jalaqydan 12%-ǵa, al áıelderdiń jalaqysy, kerisinshe, 11,5% - ǵa tómendegen.
Atyraý, Mańǵystaý ján Ulytaý oblystaryndaǵy er adamdardyń jalaqylary kóbirek bolsa, almatylyq áıelderdiń tabatyn aqshalary kóbirek eken. Sondaı-aq, Atyraý jáne Ulytaý oblystarynda da názik jandylar alatyn jalaqy mólsheri joǵary bolyp shyqty.
Jalaqylary eń tómen er adamdar Jetisý oblysynda (231,2 myń teńge), al áıelder arasynda eń tómen jalaqy alatyndar — Soltústik Qazaqstan oblysynda (223,8 myń teńge) baıqaldy.
Erler men áıelderdiń ortasha aılyq nomınaldy jalaqysy arasyndaǵy aıyrmashylyq erlerdiń paıdasyna 26,5% qurady. Bul rette bir jyl buryn aıyrmashylyq áldeqaıda az - 20,4%-dy qurady.
Óńirlik bóliniste 2023 jyly eń úlken alshaqtyq Atyraý oblysynda baıqaldy: erlerdiń paıdasyna birden 85,8% (2022 jyly-77,2%). Budan ári Mańǵystaý jáne Ulytaý oblystary: tıisinshe 72,8% jáne 52,4%. Eń az alshaqtyq Jambyl oblysynda baıqaldy: 1,8%.
Qazaqstannyń 20 óńiriniń tek ekeýinde ǵana áıelder orta eseppen er adamdarǵa qaraǵanda kóbirek aqsha tapqan. Máselen, Jetisý oblysynda erler 6,1% — ǵa, Túrkistan oblysynda áıelderge qaraǵanda 0,8% - ǵa tabysty az tapqan.
Ekonomıkalyq qyzmet túrlerine keletin bolsaq, 2023 jyly er adamdar qarjy jáne saqtandyrý qyzmeti, taý-ken óndirisi jáne karerlerdi qazý, sondaı-aq aqparat jáne baılanys salalarynda qomaqty qarjy tapty.
Áıelderge kelsek, taý-ken ónerkásibi jáne karerlerdi qazý, qarjylyq jáne saqtandyrý qyzmeti, sondaı-aq turý jáne tamaqtaný qyzmetterin usyný salalarynda olardyń eńbekteri joǵary baǵalanǵan.
Eger qyzmet túrleri boıynsha jalaqynyń aıyrmashylyǵy týraly aıtatyn bolsaq, aqparat jáne baılanys salasynda eń úlken alshaqtyq baıqaldy: erlerdiń paıdasyna 36,5%.
Budan ári óner, oıyn-saýyq jáne demalys (36,1%), qurylys (28,5%), densaýlyq saqtaý jáne halyqqa áleýmettik qyzmet kórsetý (24,1%), kólik jáne qoımalaý (23,4%) salalary ornalasqan.
Jumyspen qamtý toptary boıynsha eń úlken jalaqy alshaqtyǵy jumysshylar ónerkásibi, qurylys, kólik jáne basqa da baılanysty kásipter segmentinde baıqaldy: erlerdiń paıdasyna 45,2%. Budan ári basshylar men memlekettik qyzmetshiler (munda er adamdar sol pozısıalarda 38,2%-ǵa artyq alady), kásibı mamandar (32%), tehnık-mamandar jáne ózge de kómekshi kásibı personal (30,4%), qyzmet kórsetý jáne satý salasynyń qyzmetkerleri (25,9%), óndiristik jabdyqtardyń operatorlary, qurastyrýshylar men júrgizýshiler (24,4%(20,8%), biliktiligi joq jumysshylar (14,2%).
Er adamdarǵa qaraǵanda fermerler retinde jumys isteıtin jáne aýyl sharýashylyǵy men orman sharýashylyǵynyń, balyq sharýashylyǵynyń jáne balyq aýlaý jumysshylary retinde jumys isteıtin áıelder ǵana aldy: erlerge qaraǵanda áıelderdiń paıdasyna alshaqtyq 7,6% qurady.